Shillong, Naiwieng 12
U Chief Executive Mem-ber (CEM) ka Khasi Hills Autonomous District Council (KHADC) Bah Winston Tony Lyngdoh u la ai da ka jubab ba tyngeh ïa ki jingkynnoh jong u President ka Congress Bah Vincent H Pala ba ka Voice of the People Party (VPP) kala pynkha shuh-shuh ïa ki khyrdop bad pynlong ïa ki kum ki “ATM” ka seng.
Haba kren sha ki lad pathai khubor ha ka sngi Balang, u CEM u la ong, “Nga tharai ba phi donkam ban pan jingpynshai na u Bah Pala. Nga la ïohi ïa ki jingkren jong u, ba u kynnoh ba naduh ba ka VPP ka wan ha ka bor ha KHADC, ki khyrdop kila kylla long ki ATM jong ngi.”
U CEM uba bat ruh halade ïa ka tnat Trade, u la bynrap “Ngi la lah ban tehlakam ïa ka jingmih jong ki khyrdop kum ki tit. Na ki 23 tylli ki khyrdop, ngi la pyntreikam tang kumba 10-11 tylli. Kumno u Bah Pala u lah ban ong ba ngi la pynkylla ïa kine ki khyrdop kum ki ATM jong ngi”.
U la kyntait ruh ban kynthoh shuh shuh bad kyntu ba dei ban kylli beit beit ïa u Bah Pala, uba la pynmih ïa kane ka jingkynnoh. Shuh shuh na ka liang jong u CEM u la ïathuh ba ha ka por jong ka Executive Committee (EC) barim, kila don haduh kumba 23-24 tylli ki khyrdop hynrei ha kane ka EC ba mynta, la pynduna sha ka 10-11 tylli.
U la pynpaw ruh ba lehse ka don ka jingbakla bad ki khyrdop ba pynïaid da ka tnat Khlaw lane ki Syiem jong ki Hima bapher-bapher. Haba pynpaw ïa ka jingkyndit ïa ki jingkynthoh u Bah Pala, u Bah Winston u la ong, “Ka KHADC ka dang pyrshang ban leh eiei halor kane ka kam. Ban kynnoh ba ka VPP kala pynkylla ïa kine ki khyrdop kum ki ATM, ngam lah satia ban pdiang. Ki khyrdop kiba donkam kin dang ïai bteng ban treikam hynrei ngin ym pynbun ïa ka jingdon ki khyrdop namar ka jinglait ei ka khajna kala jur bha ïa ka KHADC”.
“Na ka tnat Trade bad Revenue jong ka Council, tang katto katne ki khyrdop kiba la pyntreikam da kane ka EC ba mynta. Ngi la dep ban pynpaw ba ngi donkam ban buh ïa ki khyrdop, hynrei kine ki khyrdop kim dei kiba thymmai, ki dei kiba la don da ki snem. Ngi shu peit beit halor ka jingbiang jong ki, lada ngi sngew ba ki donkam ban pynïaid ngi bteng ban pynïaid bad lada em, ngi weng noh ïa ki,” u la ong.
