Jakarta, Naiwieng:
Une u samla pule na Indonesia, uba la shah suba ba u long u nongpynbthei bom ha ka taïew ba la dep ha kawei ka jakamane Muslim ‘mosque’ jong ka skul heh, u la lum lang ïa ki tiar pynbthei kiba rit ha ka iingsah jong u bad u la thmu ban bud ia ki rukom leh jong ki lehnoh kiba u la lap online, hynrei la lap pat ba um shym don jingïadei bad kino- kino ki kynhun lehnoh jong katei ka ri.
Ka kynhun tohkit jong ki pulit ka Indonesia, ki la pynithuh ïa utei u samla, uba dang 17 snem ka rta, uba don napdeng ki 96 ngut kiba la mynsaw ha kitei ki jingbthei bom ha ka Sngi Thohdieng ha Jakarta, ha kaba katei ka kynhun tohkit, ka la pynpaw ba utei u samla u long u briew uba sngewtynnad ïa ki jingthoh kiba shyrkhei bad kiba ap jingma ia ka shongsuk- shongsaiñ jong ka ri. Utei u samla pule, u bym shym la ithuh kyrteng, u dang shu koit na ka jingsumar na kawei ka hospital, hadien ba u la shah sumar arsien.
“Une u khynnah u la shah pynshlur ban leh ia kum katei ka kam thombor”, la ong u Director jong ki pulit jong ka Jakarta, jong ka tnat tohkit ba iadei bad ki kam runar, u Iman Imanuddin ha ka jingialang bad ki nongthoh khubor. “U la sngew marwei bad um don jaka ban pynpaw ia la ki jing ujor, la ka long ha la ka iing ka sem, ha ka imlang sahlang ne ha skul.”
Une u samla pule u la lum lang ia hynñiew tylli ki jait bom, saw tylli na kine, ki la bthei da kaba pyndonkam da ki tiar kiba suk bha, kynthup ia ki battery 6 volt, ki Remote Control bad ki nar kiba nep kiba thmu ban pynmynsaw, la ong u Henik Maryanto jong ka Police Mobile Brigade Unit.
“Ngi la pynduh noh ia ki bom kiba dang sah, kiba khlem pat dep ban bthei”, la ong u Maryanto bad bynrap ba u suba u la buh lang ia ki marwei da kaba bud ia ki jingbthah na ka Internet.
Ki pulit ki la ioh kurup ruh ia kawei ka suloi kaba dei jong utei u samla bad kaba la thoh ia ki jingthoh kiba i kumba ki dei ki jingthoh kiba pyni bor ia ki jaitbynriew doh ‘lieh bad ki kyrteng jong ki ‘riew shim kabu jong ka pyrthei, kynthup ia ki neo-nazis kiba la shah rai pynrem halor ki kam thombor ba shyrkhei ha Canada bad Italy, u nongthombor ha ki mosque ha New Zealand bad kumjuh ruh ha Columbine High School.
