Amaravati, Rymphang:
Katkum ki khubor, la iathuh ba ki bor pyniaid ka London ki la lap ia ka metiap jong utei u nong India uba dei napoh ka jylla Andhra Pradesh, hadien ka jingpluh jong ka iingsah jong u hapoh ka nongbah London jong katei ka ri United Kingdom.
Ia utei u briew la ithuh kum u G.Abhi-shek, u long u nongshong shnong jong ka thaiñ Kondayyapeta hapoh ka shnong Peddapuram jong ka distrik Kakinada. U la leit poi sah noh sha London pat ha u snem 2023, naka bynta ban pyndep ia ka jingpule ha ka laiñ MBA bad u thmu ban shong- ban sah beit shwa ha katei ka ri naka bynta ki jingpule kiba dang sah baroh. Kane ka jingjia, ka la jia hapoh Croydon, kaba don sha ka phang South jong ka nongbah London, ha ka por kumba 1:30 jong ka step Sngi Nyngkong, ha kaba ka ding kaba khlaiñ ka la klang ha katei ka iing 2 mala kaba u shongwai hapoh Duppas Hill Terrace. Ia u Abhishek la pynbna iap ha katei hi ka jaka ba la iap ia u. Ki bor pyniaid ki ngeit ruh ba ka jingiap jong u ka lah ban dei namar ka jingbym lah ring mynsiem shuh ha ka jingkhlaiñ palat jong ka ding ha katei ka jingjia.
Ia uwei pat u briew na katei hi ka jaka, la pynkit mar-mar sha ka jakasumar ha ryngkat ki jingmynsaw kiba la jur bad kiba ap jingma ruh ia ka jingim jong u.
