Guwahati, Naiwieng:
Khyndiat sngi hadien ba la jia ka jingbthei bom kaba la shim ruh ïa ka jingim jong ki briew hajan ka Red Fort ba pawnam jong ka Delhi, u President jong ka Assam Jatiya Parishad (AJP) u Lurinjyoti Gogoi ha ka janmiet jong ka lah sngi U Blei u la pynmih ïa ka jingpynrem kaba jur halor kane ka jingthombor jong ki lehnoh, da kaba batai ïa kane kum ka “jingleh riewkhlaw kaba la pynlong ïa ka jaidbynriew baroh kawei ba kin dap da ka jingsngewsih kaba khraw.”
“Ha kane ka kynta ba la jia ka jingjia bashyrkhei, baroh ki nongshong shnong ki dei ban ïeng kawei ha ka mynsiem jong ka jinglong briew bad ka jingïeid ïa ka jaitbynriew. Ki kam lehnoh kim don jaka ha India; ngi kyntait shi syndon ïa ki. Ngi ïeng ryngkat bad ka Delhi bad ryngkat bad ka jingsuk”, la ban jur u Gogoi.
Haba phai sha ka Social Media, u Gogoi u la thoh ba u la pynrem jur ïa katei ka kam kaba shyrkhei, da kaba pynpaw ïa ka jingsngewlem sha kiba haïing hasem jong kito kiba la duh noh ïa la ka jong ka jingim bad duwai ba kiba mynsaw kin ïoh noh kloi ïa ka jingkoit jingkhiah.
U la pynpaw ba kane ka jingjia kaba shyrkhei ka la pynsngewsih jur ïa uwei pa uwei u nongshong shnong jong ka ri India bad ha kine ki por kiba ïakynduh jingeh, ki briew ki dei ban ïawan lang da ka jingïatylli, ka jingsngewrit, bad ka jingïeid ri ban jop ïa ki bor jong ki kam pyntriem.
Kane ka jingbthei bom hajan ka Red Fort ka la jia ha ka por 6:52 baje janmiet ha ka lah sngi U Blei ha kaba kawei ka Hyndai i20 kaba ïaid suki suki ka la sangeh ha ka jaka ba don ka Light saw ha ki byna ka Chandni Chowk kaba bun paid bha bad pynbthei syndon da ka jingpynbthei kaba jur.
Kane ka jingbthei ka la pynlong ïa ki shiphew ngut ki briew ba kin ïap bad katto katne ngut kiwei pat ki la mynsaw.
Ki kali kiba bun ki la shah pynjulor, light surok ki la bthei, bad ki phngit jaboh ba mih na ka jingbthei ki la satah kylleng lajan haduh ka jingjngai kaba 150 meter, kaba la wanrah ïa ka jingtieng bad jingkulmar ha katei ka thaiñ.
Ki kynhun jong ka National Investigation Agency (NIA) bad ka National Security Guard (NSG) ki la hiar sha katei ka jaka ban pynlong ïa ka jingtohkit kaba bniah, katba ki pulit ka Delhi, ryngkat bad ki tnad sorkar pdeng bad ki tnad sorkar jylla, ki la pynlong ïa ka jingtohkit lang ïa ka daw bad ka jingthmu jong kane ka jingshah pynbthei bom.
U Myntri Rangbahduh ka ri, u Narendra Modi bad u Myntri ka tnat ki kam pohïing jong ka sorkar pdeng, u Amit Shah, ki la bishar bniah ïa ka jinglong jingman bad ki la bthah ïa ki bor ba dei peit ban pynthikna ïa ka jingshngaiñ jong ka nongbah ka ri.
Ka jingkren jong u heh jong ka AJP, u Lurinjyoti Gogoi, ka pyni ïa ka sur ba ïatylli jong ka Assam, katba ki briew ha kylleng ka ri, ki ïatylli ban pynbna ba ka India, ka ïeng skhem bad ki kam pyntriem jong ki lehnoh kin ym jop satia lano lano ruh.
