Arequipa, Naiwieng:
U heh ka tnat ka koit- ka khiah jong ka Peru ha ka Sngi Palei, u la iathuh ba 37 ngut ki briew ki la iap bad 24 ngut ki la mynsaw hadien ba kawei ka bos ka la leit noh shapoh riat hadien ba ka la iatyngkhuh bad kawei ka trok ha Peru.
Kane ka la jia hapoh Arequipa, sha ka phang Shathie jong ka Peru, kaba long kawei na ki jingjia ba shyrkhei tam ha kine ki snem ba ladep ha katei ka ri South America.
Kane ka la jia ha ka step jong katei ka Sngi Balang ha kawei ka bynta jong ka surok-bah Panamericana Sur kaba pyniasoh ia ka Peru bad ka Chile.
“Ngi don ïa ka jingkheiñ ba 37 ngut kiba ïap,” nalor ki 24 ngut kiba la mynsaw, ong u Walther Oporto, uba long u nongpynïaid ka koit- ka khiah ha ka thaiñ Arequipa.
Katei ka bos, kaba la pyniaid da ka kompeni Llamosas, ka dei kaba leit na Chala, ka shnong kaba hap ha ka jylla Caraveli, sha Arequipa bad la ong ba katei ka bos ka kit ia 60 ngut ki nongleit nongwan hapoh jongka.
Shuh shuh la iathuh ba katei ka riat ba katei ka bos ka la hap, ka don ia ka jing jylliew kumba 200 meter (650 phut) hadien ba ka la ïatyngkhuh bad kawei pat ka trok pick-up ha ka lynti kaba kyllaiñ.
Ki jingjia aksiden kali ki ju jia man ka por ha Peru namar ka jingpynher stet palat jongki ha katei ka surok-bah ka bym shngaiñ bad kaba ïaid nalor jong ki riat- ki ram, ki surok ki bym don dak bad kaba pyni ruh ia ka jingbym lah ban pyntreikam ia ki aiñ da ki bor synshar.
