Nga long kum ka snieh hati bad ngam sngew ei-ei ïa ka jingkynthoh ki briew ba bishni: Lambor

Shillong, Naiwieng 13

U Bah Lambor Malngiang, MLA barim ka Nongkrem Konstitwensi ha ka 13 tarik u Naiwieng 2025, u la leit ban pynïasoh ïalade sha ka sem jong ka National People’s Party (NPP) kaba dei ka seng ba synshar ïa ka Jylla.

Ha kane ka sngi rung u Bah Lambor sha ka sem jong ka NPP la wan ban synran lang da ki spah ngut ki nongkyrshan jong u.

Ïa u Bah Lambor la pdiang sngewbha sha ka NPP, da u National President, uba dei u Myntri Rangbah ka Jylla, kata  u Conrad K Sangma, State President, Bah Prestone Tynsong, National Vice President, Bah Sniawbhalang Dhar bad kiwei-kiwei de ki nongïalam ba hakhmat jong ka seng. Nalor ka jingpdiang ïa u Bah Lambor, la pynskhem ruh ïa ki nongkitkam ka NPP Nongkrem Block.

Lah ban kdew hangne ba u Bah Lambor Malngiang u la sdang ïa ka kam saiñ hima sima ha u snem 2003 bad u la jop nyngkong ïa ka ilekshon na Nongkrem na ka seng KHNAM bad ha u snem 2008 u la shah rem noh ha u Bah Ardent uba ïeng na ka seng UDP.

Ha u snem 2013 u Bah Lambor Malngiang, u la ïakhun biang ïa ka ilekshon na ka seng Congress hynrei u la shah rem biang ha u Bah Ardent uba la ïakhun na ka seng HSPDP. U Bah Lambor u la wan phai biang kum u MLA ka Nongkrem kum u kyrtong khlem seng ha u snem 2018, da kaba pynliem ïa u Bah Ardent, hynrei ha u snem 2023 u la ïakhun na ka seng UDP bad u la shah rem biang pat ha u Bah Ardent uba dei u President jong ka seng ba thymmai, ka Voice of the People Party (VPP).

Haba kren ha kane ka sngi , u Bah Lambor u la ong ba ka Nongkrem Konstitwensi ka don ha ka jingeh bad um shym la rung sha ka NPP ban shah rem ha ka ilekshon hynrei u rung ban ïoh ïa ka jingjop, da kaba trei shitom bad ban kit ban bah ïa ka khia ka shon jong ki paidbah.

U la pynpaw ka jingsngewnguh ïa ka Sorkar MDA, kaba la ibit ban aiti ïa u, ïa ka kam Chairman Planning Board watla u dei u MDC ba khlem seng bad haba u rah ïa ki jingeh ka Sorkar kam ju kyrngah bad ka kloi ban ïarap.

“Don shibun ki nongkynthoh haba nga pynïasoh bad ka seng saiñ pyrthei kaba khlaiñ, ka NPP hynrei nga sngew ba ka long kum ka snieh hati bad ngam sngew eiei ïa ka jingkynthoh jong ki briew kiba bishni,” la ong u Bah Lambor.

U Bah Lambor u la ong ruh ba “Hashwa ba un pynïasoh bad ka seng NPP, u la leit ban ïakynduh bad ki paidbah, ban tyrwa la ka biang ne-em ban leit noh sha ka seng NPP, bad ki paidbah ba ïa kit ïa bah lang ha ka kam ki la ong, “Ko Bah Lam, kat shaba phi don ngi ruh ngin don lang beit hangta. Ka daw ka long ba ngi la ïa long-doh long-snam bad ngi ïa long kawei”. 

Kumta u la ong “Nangne shakhmat ngin ïa ïaid shakhmat ban pyntyllun ïa ka kam da ka jingtip briew tip Blei bad ngin buh ha ki jingduwai.”