Shillong, Naiwieng 13
U Myntri Rangbah ka Jylla Conrad K Sangma ha ka sngi Palei u la pyntip ba ka jingkhynra jong ka National Investigation Agency (NIA) ha South Garo Hills ka dei shibynta na ka jingtohkit ïa ka jingjia bthei bom ba dang shen ha Delhi. “Ki jingtip ba ngi ïoh ki pynpaw ba ka jingkhynra kala jia ha ki katto katne ki jaka. Ka NIA ka dang pyrshang ban lum ïa ki jingtip bad ka dei ka jingtohkit kaba dang ïaid,” ong u Conrad haba bynrap ba kam long kaba dei ban ïakren bniah namar ka dei ka kam ba ïadei bad ka jingshngaiñ ka Ri.
Haba ban jur ïa ka jingïatreilang ba pura na ka liang ka Sorkar Jylla, u Conrad u la ong, “Ngi don hangne ban ïatreilang bad ki kat kaba ngi lah, ban ai ïa ki jingïarap bad ki jingkyrshan haba donkam. Kane ka dei ka kam kaba khia bha bad ngin kiar na kaba ngam jylliew ïa ka.”
“Ngam kwah ban ïapeiñ ïa ka jingtohkit da kaba ïathuh ïa kiei kiei baroh,” u la ong.
Halor ka jingshngaiñ ka Shillong, u Conrad u la ong ba ka jinglong jingman ka ïapher bak-ly-bak haba bynrap haduh mynta kam don satia kano-kano ka daw ban sheptieng.
U la kyntait ruh ba don kino-kino ki jingphah peitngor ha Meghalaya haba pynpaw ba kaei kaba jia ka dei shibynta jong ka jingtohkit.
