Shillong, Naiwieng 13
U National President ka NPP bad Myntri Rangbah ka Jylla, Conrad K Sangma ha ka sngi Palei u la pynpaw ba ka jingthaw ïa ka Regional Front kan ym ktah satia ïa ka jingïatreilang jong ka NPP bad ka National Democratic Alliance (NDA) ba ïalam da ka BJP ha ka Sorkar Pdeng.
“Em, ngi ju ïatreilang beit bad ka NDA, ngi la kren shai ïa kane. Wat mynta ruh nga don ïa u Myntri BJP, ka TIPRA Motha ka dei shibynta jong ka Sorkar, kumta kala shai bha halor kane ka bynta,” u la ong haba ïakren bad ki nongthoh khubor.
Ha ka 4 tarik Nai-wieng, u Conrad ha ryngkat u nongseng ka TIPRA Motha u Pradyot Bikram Manikya Deb-barma, u Nongïalam barim ka BJP bad Myntri barim ka Nagaland u Mmhonlumo Kikon, u nongseng ka People’s Party ha Assam u Daniel Langthasa, kila pynbna ïa ka rai ban thaw noh ïa kawei ka seng ïatylli lang jong ki saiñ pyrthei ka ban mihkhmat na ka bynta ka jingangnud ki paidbah ka thaiñ Shatei Lam-Mihngi.
U Conrad u la batai ba ka jingmih jong kane ka kynhun riewlum ka thmu eh ban pynïoh ïa ka rynsan kaba khlaiñ ha ka ban lah ban kren ïa ki kam kiba ktah lang ïa ka thaiñ.
“Kaei kaba ngi ong ka long ba ngin ïawanlang ban pynthikna ba ngin don ïa ka rynsan kaba khlaiñ ka ban pynlah ïa ngi ban kren ïa ki jingeh ka thaiñ. Kane kam dei ka jingïakhun pyrshah ïa ki shimet hynrei ka dei tang ka jingsngewthuh ba ngi hap ban ïawanlang ban wanrah ïa ka jingïatylli khnang ba ngin khlaiñ kum ka kynhun bad kum ki nongïalam ka thaiñ, ka ban pynlah ïa ngi ban kren ïa kiwei pat ki nongïalam da ka sur kaba khlaiñ ha ki sngi ban sa wan,” u la ong.
Haba jubab ïa ka jingpynsngew ba kane ka kynhun thymmai ka khlem ïasyllok lang ïa baroh ki seng riewlum-kum ki seng riewlum na Meghalaya, Mizoram bad Arunachal, u Conrad u la pynpaw ba kiei-kiei baroh kiba jia ki dei ki kam kiba dang ïaid.
“Ka dei ka kam ba dang ïaid. Kam pat dei ba ngi la rai ba baroh kin shu wan tang haba ñion ïa uwei u budam bad baroh kin sa ïasoh lut, kam long kumta. Kane kam pat ju jia mynno-mynno ruh. Ngi la sdang ïa ka kam ha kaba katto katne ngut na ngi, ngi la rai ban ïawanlang bad ka jingïasyllok kala jia hapdeng kine ki kynhun. Kin sa rai kumno ban jam shakhmat bad hadien kin sa sdang ïasyllok bad kiwei pat ki seng saiñ pyrthei kiba kwah ïatreilang bad kiba kwah ban wan shakhmat”.
