U Khasi naduh kulong kumah u long u jaitbynriew uba im da ka rep ka riang. Kat shaba u leit rep leit riang u pynlong jaka shong jaka sah bad buhai shnong ha kita ki jaka ba u leit rep. Ha kano kano ka jaka ba u leit rep lyngba u shong u sah noh hangta. Haba u leit rep ki shait kynriah de na kawei ka jaka sha kawei pat. Dei ha kane ka rukom ba ki don ki shnong kiba don ha khlieh ki Lum, ki don ki shnong kiba don ha ki sharing Lum, ki don ki shnong kiba don harud ki wah bad ki jaka them. Lehse kane ka sakhi shai kdar ïa ka jingdon ki shnong Khasi mynta mynne ha ki jaka bapher bapher ka Bri u Hynñiewtrep. Namar ha ki por mynbarim u Khasi um ju shong neh sah hajuh ka jaka namar u hap ban kynriah ne kawei ka jaka sha kawei pat. Namar ban rep ha kajuh ka jaka kam da long bha shuh. Namar mynshuwa ki ju rep lyngkha lane ka rep jhum.
Kumta ki hap kynriah na kawei ka jaka sha kawei pat. Kane ka dei ka rukom im bad ka rukom rep jong u mynbarim ha kine ki lum ba itynnad ka Bri u Hynñiewtrep. Dei mynta keiñ ki briew ki la sngewthuh bad ki shong noh hajuh ki la pynlong shnong kiba heh bad ba bun briew, ym kum mynshuwa kim da don ki shnong kiba bun briew, namar ki shong ki sah ha ki jaka khlaw bad ha ki ranap ki lum bad ha trai ki lum ban rep ban riang. Kumne ki im suk im saiñ ha ka kam rep kam riang ha ki por mynbarim bajah. Kane keiñ ka dei kata ka riti dustur jong ki longshuwa manshuwa kiba im bad shong ha kine ki lum ka ri Khasi – Jaiñtia mynta. Kane ka rukom im ki longshuwa jong ngi ha ki por ba la leit.
C. B. Iawphniaw
