Shillong, Naiwieng 14
Ka seng Bharatiya Janata Party (BJP) ka la ïoh haduh 90 ngut ki MLA ha ka jingpynbna ïa ka risol ilekshon ha Jylla Bihar kaba la ñiew ïa ki vote ha ka 14 tarik Naiwieng 2025.
Katkum ka thup ba la pyllait da ka Election Commission of India ka jingdon ki Constituency ha Jylla Bihar ka long 243 tylli ha kaba ka seng BJP ka la ïoh haduh 90 ngut ki MLA katba ka seng Jana Dal (United) ka la ïoh 84 ngut ki MLA, kiba dei ki seng kiba don ha ka Sorkar synrop National Democratic Alliance.
Katba ka seng Rashtriya Janata Dal (RJD) ka la ïoh 25 ngut ki MLA, ka Lok Janshakti Party (Ram Vilas) – LJPRV ka la ïoh 19 ngut, ka Communist Party of India (Marxist-Leninist) (Liberation) ka la ïoh uwei, Ka Indian National Congress – INC ka la ïoh 6 ngut, ka Hindustani Awam Morcha (Secular) – HAMS ka la ïoh 5 ngut, Rashtriya Lok Morcha bad ka All India Majlis-E-Ittehadul Muslimeen ki la ïoh mar 4 ngut, ka Communist Party of India (Marxist) ka la ïoh uwei, ka Bahujan Samaj Party ka la ïoh uwei.
Ka BJP kaba la ïoh 90 ngut ka la pyni ba ka kham kiew mynta u snem namar ka la ïoh tam sa 18 ngut lada ïanujor bad ki snem ba la dep, ka JD(U) kaba ïoh 84 ngut ka la kham kiew mynta u snem namar ka la ïoh tam sa 41 ngut ki MLA.
Katba ka RJD kaba ïoh 25 ngut ka la hiar haduh 50 lada ïanujor bad ki snem ba la dep, ka Congress kaba ïoh 6 ngut ka la hiar haduh 13 ngut na ki snem ba la dep.
Katba ka Lok Janshakti Party kaba ïoh tang uwei u MLA ha ki snem ba la dep mynta ka la ïoh tam sa 19 ngut kane ka pyni ba kane ka seng ka la kiew bha.
Watla ka BJP ka la ïoh bun ngut ki MLA hynrei ka hap ban ïapynbeit bad ka seng JD(U) kaba ïoh 84 ngut ki MLA ba la ïalam da u Nitish Kumar mano ban shimti ïa ka kam kum u Myntri Rangbah ka Jylla Bihar.
