Shillong, Naiwieng 14
Kum shi bynta ban ïarap ban pynsaphriang bad ban nang pynkhlaiñ shuh-shuh ïa ka kam ïalehkai Cricket hangne hapoh ka Jylla hapdeng ki samla trai ri trai muluk, ka Apex Council ka Meghalaya Cricket Association, ka la shim ïa ka rai bah ka jong ka, bad kata hi ka long ba nangne shakhmat kan ïarap ban kyrshan lem na ka liang ka jong ka ïa ka lympung ïalehkai cricket ba pynlong da ka Khasi Students’ Union.
Ïa kane la pyntip mynta ka sngi da u Secretary ka MCA u Bah Raynold Kharkamni.
Kumban shu pyntip hangne, ba ka don kawei ka lympung ba la ai kyrteng ïa ka kum ka Maitshaphrang Khasi League, kaba dei ha ka dur jong ka rukom ïalehkai T20, ha kaba ka thong jong kane hi ka long ban lah ha kaban bsut ha ka jingmut ki khun samla Khasi, ba kin phai lem la ki jong ki khmat sa sha kane kawei pat ka jingïalehkai, kaba long ruh ka pliang ja, lada ki khun samla, ki minot bad trei shitom.
Ym tang katne, ka MCA, ka pynkhreh ba kan shim ruh ïa ka sien jam ba kan pynphriang lem ïa kum kane ka khubor sha ki ri lum Garo, ha kaba u Vice President ka MCA u Sengnab Momin, u long u nonglam khmat ïa kane ka kam ha ka dong ka thaiñ ka jong u, la bynrap shuh-shuh u Bah Raynold.
