Shillong, Naiwieng 16
Kan long ka sngi kaba pynsah jingkynmaw ïa baroh ki nongshong shnong ka Mawdngung, East Khasi Hills District, kaba hap hapoh ka Sohïong C& RD Block ha kaba ka shnong ka la plie paidbah ïa ka Viewpoint kaba itynnad hapoh ka shnong, kaba la tip kum ka Mawdngung Viewpoint .
Ïa kane ka Viewpoint, la plie paidbah da u Block Development Officer ka Sohïong C&RD Block, u Dr.C.J.K .Warjri, ha ka 14 tarik u Naiwieng 2025, uba long ruh kum u Kongsan, ha ka jingdon lang ki briew ka blok, ki nongkitkam shnong, ki nongïalam ka Balang Presbyterian Mawdngung, ki nongshnong shnong, ki nongshah khot sngewbha nalor kiwei-kiwei de.
Hadien ba la dep plie paidbah ïa katei ka Viewpoint, la pynbud sa da ka jingïalang ba la pynïaid da u Rangbah Shnong, u Bah Newshai Khyriem .
La pyniphuh iphieng bad pynshit pynshngaiñ ïa kane ka jingïalang plie ïa ka Viewpoint lyngba ka rwai ka shad na ki samla.
Haba kren ha kane ka jingïalang, u Rangbah Shnong u la ïathuh, ba ïa kane ka Viewpoint la pyntrei lyngba ka jingïarap na ka ophis blok Sohïong lyngba ka skhim 100 sngi, ha ka jinglut kaba kot sha ka T.42 lak bad ka shim por hynñiew bnai ban pyndep ïa kane ka Viewpoint .
Ha kane ka sngi, la ïoh ruh ban pyllait paidbah ïa ka jingrwai anthem jong ka shnong da u Kongsan, u Dr.C.J.K .Warjri.
Na ka liang u Dr.C.J.K .Warjri u la pynpaw ïa ka jingsngew kmen ïa ka jingtrei shitom ka shnong haduh ba kan da lah ban plie syndon da ka Viewpoint.
U la ïathuh ruh, ba ha kane ka shnong ki dang bun ki kam na ka bynta ka bha ka miat jong ka shnong, hynrei dei ban ïai shah ban ap, kumba katto-kattne por.
U Dr.C.J.K .Warjri la kular ruh ïa ka shnong ïa ka dorkhas kaba ka shnong ka la ai ha u, da kaba ong “Ka blok kan sa ïarap ban pynshna da ka surok dew bilat lane kata ka CC, Road bad ki jingïalehkai jong ki khynnah.
