Shillong, Naiwieng 16
Ka Hynñiewtrep Integrated Territorial Organization (HITO) Shillong City ha ryngkat ka Mawiong Unit ha ka janmiet jong ka 16 tarik u Niawieng 2025, ki la ïoh bat haduh 10 ngut ki bar jylla ki bym don kot don sla ha Umiam, hajan Lad Umsaw.
Kine ki bar jylla ki dei kiba wan na Jylla Uttar Pradesh kiba thmu leit bylla sha Khliehriat.
Haba kren halor ka jingïoh bat ïa kitei ki bar jylla, u samla Pynshngaiñ Nongrum, Organizing Secretary ka HITO Shillong City u la ong, ba dei hadien ba ki la ïoh jingujor na ki paidbah ba ki don ki bar jylla ki bym don kot don sla kiba thmu leit sha Khliehriat.
Kumta u la ong ba na ka liang ka seng ka la pynphai noh shi syndon ïa kitei ki bar jylla sha ka jaka ba ki wan.
U la ïathuh ba napdeng kine ki bar jylla kiba la ïoh bat ki don ruh kiba dang khynnah ki bym pat don ha ka rta ba 18 snem, da kaba kyrpad ruh ïa ka Infiltration Check Gate kaba don, ba kin shu peit tang ïa ka Adhaar kam don jingmut namar kim tip ba kine ki wan naei bad leit shaei.
U samla Pynshngaiñ Nongrum u la kyrpad ruh ïa ka Sorkar Jylla, da kaba ong “Ngi la donkam shisha ïa ka Inner Line Permit (ILP), ban long ka jingïada, khamtam ba ngi dei na ka jaitbynriew rit paid.
“Ngi donkam ban ïada ïa ka khyndew ka shyiap, ka kam ka jam ruh la knieh lut da ki bar jylla. Ai noh ïa ngi ïakata ka ILP, ban long ka jingïada,” la ong u samla Pynshngaiñ.
