Shillong, Naiwieng 16
Haduh 22 tylli ki wiket ki la hap ha ka sngi kaba sdang jong ka jingïakhun hapdeng ka Meghalaya pyrshah ïa ka Sikkim ha ka U-19 Cooch Behar Trophy 2025-26, kaba la sdang naduh ka sngi U Blei ha madan ialehkai cricket jong ka MCA, ha Polo.
Hadien ba ka Meghalaya ka la jop ïa ka jingkynting pisa, ka la ailad shwa ïa ka Sikkim ba kan tied nyngkong, ha kaba ka la shah pynhap lut ki wiket jong ka bad kamai tang 76 ron. Hadien kane, ka Meghalaya kaba la wan ban sdang ha ka ban tied ïa la ka pali kaba nyngkong, ka la lah ba kan kamai 108 ron, kaba pynlong pat ïa ka Sikkim, ba sa shisien ba kan khreh biang ïa ka jingtied ïa ka pali kaba ar, hadien ba ka la kamai 46 ron bad hap noh 2 wiket bad ban tam kylla da 14 ron ïa ka Meghalaya.
Ka sngi ba sdang jong kane ka jingïakhun, ka long kaba ithiang da ka jingshat phyrnai bha ki kjat sngi, kaba la ïarap ka dei ïa ki nongkawang bol ba kin lah ban ïalehkai bha.
Ha kum kane ka jingïakhun, ka kyrteng jong ka sur ïalehkai ka la wan mih paw na u Mewankitbok Kharpuri uba shipor u la don bynta ruh bad ka lympung ïakhun ha ka Vinoo Mankad Trophy (one day tournament), kaba hadien kane, ban jam pat sa sha kane kawei pat ka kyrdan ïakhun ba kham heh (first class), ha kaba u la lah shisha ban pynpaw ïa ka jingtbit jong u ban lamkhmat ïa ka kynhun ki nongkawangbol ka Meghalaya ban khur 5 wiket na ka bynta 17 ron na ki 10.1 over, bad la bynrap lang sa Gaurav Narleng 2 wiket na ka bynta 18 ron na ki 6 over, u Apandanka R Marak 2 wiket na ka bynta 21 ron na ki 9 over bad u Paisal Ali u la khur shi wiket.
Hynrei haba wan ban sdang ïa ka pali ban wan tied, ka Meghalaya ka la shah pynhap wiket kynsan, hynrei da ka jinglah ban ïalehkai bha na u Rudra Singh Rathor (24 na ki 44 bol) bad u Gaurav (22 na ki 28 bol), ki la seng ïa ka nongrim kamai ron na ka bynta ka wiket kaba lai kaba long 37 ron.
Ha ka khyllipmat kaba kine ki arngut I kumba ki la skhem bha ka rukom ïalehkai jong ki, hyneri ka Sikkim ka la lah ban pynhap wiket lyngba u Parvin (3/26 na ki 11) bad u Bhavya (5/17 na ki 3.2). Hangne pat u Mewankitbok u la wan ban pyllait im ïa la ka kynhun hadien ba u la lah ban kamai 34 ron na ki 32 tylli ki bol, kaba la shu biang ïa ka Meghalaya ba kan tam palat ïa ka spah ron jong ka.
Hadien kane, ka Sikkim, kaba la sdang ban wan tied ïa ka pali kaba ar, sa shisien kam shym la ïoh ïa ka jingsdang ba paka, hadien ba u Gaurav ha ka over kaba nyngkong u la ïoh ban khur kawei ka wiket, hadien kane u Avneesh (23) bad u Sahil (18 not out), ki la bteng ban kamai haduh 43 ron hapdeng jong ki, hynrei shwa ba ka sngi kan khreh ban jam sha kaba kut, u Mewan u la ïoh ban khur pat ïa ka wiket jong u Avneesh kaba pynlong pat ïa kane ka jingïakhun ban ap khmih lynti kaei pat ka ban jia ha ka sngi kaba bud.
