Shillong, Naiwieng 17
Ka kynhun ki rangïalehkai ka India kaba la poi ha Dhaka ha ka sngi Saitjaiñ, ka la long ba la pynkhreh ban ïakhun pyrshah ïa ka Bangladesh ha ka lympung ïalehkai AFC Asian Cup 2027 Qualifiers Final Round ha ka sngi Ba-ar ha National Stadium kaba ha Dhaka ha ka por 7:30 janmiet.
U rangapkol kane ka kynhun u Gurpreet Singh Sandhu u la ong ba ka jingïakhun kan ïai long kaba eh bad kaba jwat. “Kan ym pynkylla ïa ka jingïalehkai ka ban pynhun ïa ki nongpeitkai. Ka dei beit ka jingïalehkai kaba itynnad na ka bynta ki paidbah ka Bangladesh namar ba ka dei ka jingïakhun pyrshah ïa ka India.”
Kane ka dei ka sien kaba 30 hapdeng ka India bad ka Bangladesh. Ka India ka la jop teng haduh 14 sien, shah rem saw sien bad ïakhaid 11 sien, kynthup ïa ka jingïalehkai ba dangshen ha u Lber kaba la long ha ka nongbah Shillong.
Kane ka jingïalehkai ha ka sngi Ba-ar kan dei ka sien kaba nyngkong eh ha ki 22 snem ha kaba ka India kan ïakynduh pyrshah ïa ka Bangladesh ha Bangladesh. Ka jingïalehkai ba khatduh eh ka dei ha ka SAFF Gold Cup 2003, ha kaba ka Bangladesh ka la jop da 2-1 kol ha Dhaka.
Na ka liang u rangïalehkai ‘dien, u Sandesh Jhingan, uba la bat kum u kapten ha ka por ba ka India ka la ïakynduh ha u Lber mynta u snem ha Shillong, u la ong, “Ka jingkhmih lynti jong ngi ka long kaba suk bha. Kane ka long ban ïalehkai katba lah ha madan. Lada ngi lah ban leh kumta, kiwei pat kin bud. Ngin hap ban ïakhun tyngeh ryngkat ka jingkhmih lynti ban khur ïa ka jingjop.”
U rangïalehkai shapdeng u Lallianzuala Chhangte u dei tang ma u hi ha ka kynhun ïalehkai ba mynta uba la mihkhmat ïa ka India ha ka madan ïalehkai jong ka Bangladesh mynshwa – kata ka dei ha ka SAFF Championship 2018, ha kaba u la thep shi kol.
Hynrei u Jhingan bad u Sandhu ki la ïalehkai ha Bangladesh mynshwa na ka bynta ki kynhun ïalehkai jong ka India bad ka Bengaluru FC ha ki rta ba ki dang khynnah.
U Jhingan u la pynkynmaw, “Nga la ju ïalehkai hangne mynshuwa bad ka kynhun ïalehkai Under-23 ha ka AFC U-23 Championship ha u snem 2015, bad ruh na ka bynta ka klob. Ki paidbah jong ka ri Bangladesh ki long kiba sngewtynnad ïa ka phutbol, bad ki kyrshan bha ïa ka kynhun jong ki.”
Kum shi bynta ban pynkhreh ïa kane ka lympung, ka India kaba la kilanmet bad ka la ïoh ruh ban ïalehkai paralok pyrshah ïa ka Bhutan ha ka sngi Palei jong ka taïew ba la lah bad ka la jop da 6-1 kol ha Bengaluru.
Ha katei kajuh ka sngi ka Bangladesh ka la ïakhaid mar 2-2 kol ha ka jingïakhun pyrshah ïa ka Nepal ha ka jingïalehkai paralok kaba la long ha Dhaka bad u Hamza Choudhury u la thep baroh ar kol.
