Shillong, Naiwieng 17
Kawei ka jingjia kaba sngewsih bad kaba la pynbitar ïa ki nongshong shnong ka thaiñ, ha kaba ki runar ki bym lah ban tip ne ithuh kyrteng, ki la leit ban pynpra dusmon ïa u motdur u Jisu uba ïeng ha Ïingmane ka Syiem Jingsuk, Amlarem Parish.
Katkum ki dur ba la saphriang ha ki rynsan social media, ki runar ki la pynpra dusmon ïa u motdur u Jisu nalor ki la pynpra ruh ïa ki motdur ba don lang ha syndah u motdur jong u Jisu.
Halor kane ka jingjia, na ka liang u samla Youdahunki Shylla, u nongshong shnong jong ka thaiñ War Jaiñtia u la mih shakhmat ban pynrem jur ïa ki runar kiba la leh ïa kane ka kam ban pynpra dusmon ïa u motdur u Jisu.
Haba kren sha ki lad pathai khubor ha ka 17 tarik u Naiwieng 2025, u Samla Youdahunki u la ong, ba kane ka jingjia kadei kaba la jia myn ha ka 13 tarik u Naiwieng 2025, ha kapor kumba 11 baje eiei mynmiet, bad haduh mynta kim shym pat lap ksai ïa ki runar kiba leh ïa kane ka kam.
U la ong, ba kum kane ka jingjia kam pat ju jia koit ha katei ka thaiñ, ban leit pynpra dusmon ïa u motdur u Jisu, hynrei kadei ka sien kaba nyngkong eh kaba kum kane kan jia ka wan jia.
Nalor kata, u ong ba ka tnad pulit kadei ban shimkhia mardor halor kane ka kam, ban lap ïa ki runar kiba donkti ban pynpra ïa u motdur u Jisu.
“Lada dei mano-mano ruh kiba donkti halor kane ka kam, ym dei ban ailad hynrei dei ban pynshitom katkum ka aiñ,” la bynrap u samla Youdahunki.
U la ong “Kane ka la dei beit ka jingthmu lypa jongno re jongno. Ngim lah ban ong ba dei ki riew shit ñiam hynrei ïoh lehse kane kadei hi ka jingleh jong ki briew jong ngi hi, hynrei ngi shaniah beit ha ka aiñ ba kan shim ïa la ka jong ka bynta”.
