Shillong, Naiwieng 18
Ki pulit ki la ïoh ban bat noh ïa ki ar ngut ki briew ryngkat bad kawei ka arshaka bad na ka jingtohkit la lap ba kine ki briew ki la thmu ban leit pynpoi ïa kane ka arshaka sha khappud ka India Bangladesh.
Katkum ka khubor na ki pulit la ong ba ha ka miet jong ka 15 tarik mynta u bnai, hadien ka jingïoh ïa ka jingtip, ki la ïoh ban bat ïa kawei ka arshaka ryngkat bad ar ngut ki briew ba la tip kyrteng kum u Biangbok L Nonglait (19 snem) bad u Mutadkhar Khongmalai (21 snem) ha shnong Laitmynrieng ha East Khasi Hills.
Hadien ba la ïoh bat bad haba la pynlong ka jingtohkit, la lap ba ïa katei ka arshaka la shim na uwei u briew bym tip kyrteng bad kaba la siew ïa ka pisa kaba long T.1.5 lak na ka bynta ka arshaka bad ruh T.5000 la siew kum ka pisa ban pynpoi ïa kane ka arshaka sha khappud ka India bad Bangladesh. Ha kaba ïadei bad kane, ka jingtohkit ka dang ïaid shakhmat.
Ha kawei pat ka khubor, u Kamal Gurung u la ai ka jingujor ba ha ka 16 tarik mynta u bnai ha ka por dang 2 baje mynstep, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-S-9117 na ka thaiñ Golf Links, Shillong.
Katba u Abhinav Kumar ruh u la ai ka jingujor ba ha ka miet jong ka 14 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number AS11-M-6692 na ka thaiñ Chiehruphi ha East Jaiñtia Hills.
