Tura, Naiwieng 18
Ka NGCO kaba don ha Williamnagar ka la pynpaw ïa ka jingpyrshah jur halor ki jingkynnoh kam tih maw be-aiñ ha Ri-lum Garo da kaba kdew kyrpang ïa ka jinglong-jingman kaba nang ïaid ha Paromgre, South Garo Hills, bad ñiew ïa kane kum ka jingpynkheiñ ïa ki kyndon jong ka Khyrnit ba 6.
“Ngi pynpaw ka jingpyrshah jur ïa ki kam tih maw be-aiñ kiba dang ïaid ha kylleng ka Ri-lum Garo. Ka jingpynheh sted bad ba khlem jingbit ïa kine ki kam ka la wanrah ïa ka jingsngewkhia kaba jur ha ki paidbah, khamtam namarba ki pynkheiñ ïa ki kyndon ïada jong ka Riti Synshar ka ri ba la shon hapoh ka Khyrnit ba 6 jong ka Riti Synshar ka Ri India,” la ong ka kynhun.
Katkum ka jingong katei ka kynhun, ka long kaba sngew shyrkhei ba la ai jingbit ban tih maw hapoh ki jaka ba hap hapoh ka Khyrnit ba 6 khlem kano-kano ka jingïamir-jingmut ne jingmynjur na ka Garo Hills Autonomous District Council (GHADC).
Ka la bynrap ba katkum ki General Administration Rules (GAR) bad ka saiñdur jong ka Riti Synshar, ym don kano-kano ka kam tih marpoh khyndew kaba lah ban sdang katkum ka aiñ hapoh ka jaka ba peit ka GHADC khlem ka jingmynjur kaba shai jong ka Council.
Ka kynhun ka la kam ba ka tnad khlaw ka Jylla lem bad ka tnad Mining la kynnoh ba ki la ai jingbit hi ban tih maw (khlem ka jingmynjur lang), khlem da kheiñ ïa ka rukom treikam kaba donkam ban ïamir-jingmut bad ka GHADC, watla ki don ki kyndon kiba ïadei bad kane.
“Ngi khamtam, ngi sngewkhia jur halor ki kaiphod ba la pynkhreh ïa ki kam tih ha Rongma Paromgre, Chokpot, South Garo Hills, khlem kano-kano ka jingmynjur jong ka GHADC. Ka jingïaid shakhmat bad kum kine ki kam ka long ka jingpynkheiñ ïa ka Kyrnit ba 6, ka ‘Mining Policy’, bad ka hok tynrai jong ka imlang-sahlang halor ka khyndew ka shyiap bad ki marpoh khyndew,” ka la ong.
Ka kynhun ka la dawa ban pynsangeh noh mardor ïa baroh ki kam tih be-aiñ ha baroh kawei ka Ri-lum Garo, ban pyndam noh ïa kino-kino ki jingbit (ban tih) ba la ai da ki tnad Sorkar khlem ka jingmynjur jong ka GHADC – ban sdang ïa ka jingtohkit ba laitluid halor ka rukom ai ïa kum kine ki jingbit bad kumjuh ban pynskhem ïa ka bor riti-synshar jong ka GHADC halor ka jingpynïaid ïa ka khyndew ka shyiap bad ki marpoh khyndew.
