Tura, Naiwieng 18
U Myntri Rangbah ka Jylla, u Conrad K. Sangma ha ka Sngi Ba-ar u la ïalam ïa ka jingïalang ban pynher lama ha P.A. Sangma Sports Complex, Tura, ha kaba u la pynher ïa ka Lama ka Ri kaba heh ne ‘high mast’ kaba la pynïeng ha katei ka jaka.
U Myntri Rangbah u la pynher ïa ka Lama ka Ri ha ryngkat ka jingsynrang lang jong ka jingrwai ka ri.
Ha ka jingkren jong u, u la pynpaw ïa ka jingsngew sarong bad jingieid ri ban pynher ïa ka Lama Lai Rong kaba heh ha P.A. Sangma Integrated Sports Complex, Dakopgre.
“Ka Lama ka Ri ka dei ka dak jong ka jinglong kyrpang jong ngi bad pyni ïa ka jingïatylli, ka histori, ka jinglong trai-ri, ka jinglaitluid bad ki nongrim ba kordor jong ngi bad ka jingpynher ïa kane ka Lama kaba heh ka pyni ïa ka jingburom jong ngi ïa ka ri bakhraw jong ngi – ka India”, u la ong.
U la ong ruh ba ka Tura ka dei ka jaka kaba ar ha ka Jylla ban don ïa ka Lama kaba heh bad pyntip ba ïa kum kine ki Lama ba heh yn sa pynher ruh ha Jowai bad ha baroh ki District Headquarter jong ka Jylla.
U la ong ba ki don shibun ki jingthmu bad ki prokram jong ka Sorkar na ka bynta ban pynitynnad ïa ka sor Tura.
“Ka bynta kaba ar jong ka ‘Tura Beautification Project’ kan sa sdang noh shen bad hapoh kane ka kylla kaba ar, ngi la mang pisa T.16 klur na ka bynta ban pynitynnad ïa ka thaiñ Tura Bazar ka ban kynthup ïa ki ‘Street Light’, ka jingpynbha ïa ki lynti ïaid kjat bad ban pynkylla ïa ka dur ka dar baroh kawei jong ka Tura Super Market,” u la ong.
U la ïathuh ruh ba ha ka kylla kaba lai haba ïadei bad ka jingpynitynnad ïa ka surok kaba sdang na Lad Araimile haduh kaba kut jong ka surok P.A. Sangma, shen yn sa sdang noh.
Ha kajuh ka por, u la ong ba ka ‘Paint My City Campaign’ kan dang ïai bteng ha kaba yn ñiad rong ïa ki ïingmala, ki kynroh, bad u la pan ka jingïatreilang na ki paidbah ha kane ka sienjam.
U Myntri Rangbah ka Jylla u la pynpaw ruh ïa ki jingtei kiba la dep bad kiba dang ïaid shakhmat ha ka thaiñ Dakopgre.
“Ka Dakopgre ka dei ka jaka kaba kongsan jong ka sor Tura kaba don shibun ki kam pynroi bad ki jingtei kiba jia hangne”, u la ong.
U la pyntip ruh ba ki kam na ka bynta ka Additional Secretariat ki dang ïaid shaid-shaid shakhmat.
“Hajan ka ïingmala jong ka ophis MPSC kaba la plie ha ka taïew ba la dep, ki kam ki dang ïaid shakhmat ha ka rukom kaba sted na ka bynta ka Convention Centre ka ban long ka jaka kaba kongsan ban pynlong ïa ki jingïalang kongsan kiba rit, kiba pdeng lem bad kiwei-kiwei ki jingïalang,” u la ong.
U la pyntip ruh ba ka jingtei kaba kongsan kan sa ïeng ha kaba ka Orchid Hotel ka barim ka don ha Dakopgre bad ong, “Ka ‘5 Star Hotel’ kaba nyngkong eh jong ka Tura, da ka Hilton Group kan long ka jingtei kaba kongsan bad ngi khmih lynti ba yn pyndep ïa kane ka ‘Hotel’ hapoh 24 bnai.”
Haba pyntip halor ka jinglong ba la khreh jong ka sor Tura na ka bynta ka ‘National Games’ ha u snem 2027, u Myntri Rangbah u la ong, “Ka jingtrei ban pynheh ïa ka Pa Togan Nengminja Stadium na ka bynta ban shna shuh ïa ki ‘Gallery’ bad kiwei-kiwei ki jingdonkam ka dang ïaid shakhmat bad ki jingtrei ki dang ïaid shakhmat kumba ngi kren, na ka bynta ka ‘Multi Disciplinary Indoor Stadium’ hajan ka P.A. Sangma Stadium bad ruh na bynta ka Sunny Hill Indoor Stadium.”
Ha kaba kut, u Myntri Rangbah u la kyntu ïa ki paidbah nongshong shnong ka sor Tura ban ïatreilang bad kyrshan ïa ki jingthmu jong ka Sorkar khamtam ïa ki projek pynitynnad.
“Ka dei ka kamram jong uwei-pa-uwei u nongshong shnong ban pynneh-pynsah ïa ka jingkhuid jong ka sor Tura lym kumta baroh kiwei pat ki kam pynroi ne ki jingtei kin ym don jingmut”, u la ong.
Ha kaba kut jong kane ka prokram, u Myntri Rangbah u la kaweh lama ruh kum ka jingpyllait ïa ka kor sar surok.
