Shillong, Naiwieng 19
Ki samla pule ka skulbah NEHU kata ka North Eastern Hill University Student Union (NEHUSU) ha ka janmiet jong ka 19 tarik u Naiwieng 2025, ki la pynpaw ïa ka jingsngewkhia ha kaba ïadei bad ka jingjia shah tynrah kali jong ki 2 ngut ki samla pule kiba pule ha ka skulbah namar ka dang dei ka sien kaba nyngkong kum kane ka jingjia.
Na ka liang ka kynhun ki samla pule ki la phah da ka jingthoh sha u Pro Vice Chancellor ban thied noh da ka kali kit nongpang kaba thymmai namar ym lah ban tip ïa ki jingjia ki ban sa wan, kumjuh ruh ki la phah da ka jingthoh ban buh bad pynbiang da ki ‘speed breaker’ ha man ki jaka hapoh ka skulbah.
Shuh-shuh ki la ai khublei ïa ka Sorkar ba ka la shim ka jingkitkhlieh ban phah sumar na ka bynta ka bailut baisep baroh, kumjuh ruh sha ki paidbah kiba la synñiang pisa, bad sha baroh kiba la don ka mynsiem ban synñiang na ka bynta kine arngut ki samla pule.
U Samla Menlamlynti Markhap, President NEHUSU u la ïathuh ba na ka liang u Pro VC un sa khot ka jingïalang ïa ki nongïalam ka kynhun ki samla pule nangta ki nongap pahara ban shim rai kumno ban peit na ka bynta ka bha ka miat hapoh ka skulbah.
Lah ban kdew ki arngut ki samla pule ka skulbah NEHU ki la mynsaw jur na ka jingshah tynrah da ka kali hakhmat ka gate-2 NEHU ha ka miet jong ka 17 tarik mynta u bnai Naiwieng 2025.
Kine ki arngut ki samla ki long ka samla Stephanie Shadap bad ka samla Daritngen Pohdukhei kiba dei na kajuh ka klas ha kajuh ka department chemistry kiba dang pule ha ka First Semester ha NEHU. Kine ki samla mynta ki dang don ha ka jingshah sumar bad ki dang thiah ha ICU Nazareth Hospital bad kawei napdeng kine ka dang don hapdeng ka jingshitom kaba jur.
