Shillong, Naiwieng 20
Ka All India Football Federation (AIFF) ka la pynthymmai ïa ki kyndon ïalehkai na ka bynta ki rangïalehkai na ka bynta ka lympung ïalehkai Santosh Trophy ha kaba la shah ïa ki jylla ban pynïalehkai tang ïa kito ki rangïalehkai kiba la kha hapoh u pud u sam jong ka.
Katkum ka jingpynbna dangshen da ka AIFF ba la pyllait da u deputy secretary general u M Satyanarayan u la ong, “tang ki nongïalehkai kiba la kha bad kiba long trai shnong na kito ki jylla kiba la lah ban mihkhmat ha ka national football championships, ka ban sdang naduh ka Santosh Trophy 2025-26.”
Kham hashwa ka AIFF ka la ailad ïa ki jylla ban pynïalehkai ïa ki nongïalehkai ba la kha shabar ka jylla, hynrei kiba dei pat ki ban sah pura ar snem. La shah ruh ïa saw ngut ki nongïalehkai kiba la kha shabar na kito ki jylla bad ki bym dei kiba long trai shnong na kito ki jylla, lada ki la pynrung kyrteng na ka bynta kano kano ka klob kaba don hapoh ka jingpeit jong ka jylla. Katto katne ki jylla kiba kham tlot ki la shaniah namar ki wan nabar ban kyntiew ïa ka lad jong ki ha ki jingïalehkai hapoh ka ri.
Yn shah ïa ki nongïalehkai kiba trei bad ka Services lane Railways ban mihkhmat ïa la ki jong ki jong ki kynhun. Ïa kine ki rai la shim da ka competitions committee jong ka AIFF ha ka jingïalang jong ka kaba la long ha ka 11 tarik u Naiwieng. “Ar tylli ki rai ba kongsan la shim da ka komiti. La pynrung biang ïa ka jingbun ki nongïalehkai sha ki 22 ngut na ka bynta kawei pa kawei ka kyrdan jong ka jingïalehkai, bad la pynkylla ïa ki kyndon ban ïoh ïalehkai”, la ong u Satyanarayan ha ka email kaba u la phah sha baroh ki dkhot jong ki synjuk ïalehkai kiba don ha kylleng jong ka ri.
Ha ki katto katne phew snem, la shah ban pynïalehkai da ki nongïalehkai kiba la mih ban ïalehkai na ki klob. Hadien la pynkylla ïa kane ka kyndon ban ailad ïa ki nongïalehkai ban mihkhmat ïa ki jylla trai jong ki, lada donkam, wat lada ki ïalehkai shawei ki jaka. Ki jylla kum ka Bengal, kiba lah ban jied mynshwa ïa ki nongïalehkai kiba ïalehkai na ka Mohun Bagan bad ka East Bengal ha Kolkata, kumjuh ki jylla kum ka Manipur, Mizoram, Punjab bad Kerala ki la nangpynkhlaiñ.
