Shillong, Naiwieng 20
U Myntri ba khmih ïa ka tnat Tourism u Timothy D Shira ha ka sngi Palei u la pynbna ba ka jingtei na ka bynta ka jaka kaba shirta (permanent venue) na ka bynta ban pynlong ïa ka tamasa Shillong Cherry Blossom Festival ka dang don mynta ha ka jingtei, kaba long shabar jong ka nongbah.
“Mynta, ka jingtei ïa ka jaka kaba pura bad paka ka dang don hapdeng ka jingtei kaba long shabar jong ka nongbah Shillong. Namar ba ka dang don hapoh ka jingtei, kumta la hap ban pynlong ïa katei ka tamasa ha nongbah Shillong, namar ngi don ka jaka kaba heh bad kylluid kum ka JN Stadium,” la ong u Timothy haba jubab halor ka jingshah kynthoh ka Sorkar na ka bynta ka jingpynlong ïa katei ka tamasa ha nongbah Shillong, kaba la khapngiah lypa.
U Myntri u la bynrap, “Ki jingkynthoh kin don beit manla ki por, haba phi leh ïa ki kam ba bha ruh kin don ki jingkynthoh, haba leh kam sniew ruh kin don ki jingkynthoh. Ngim kynnoh satia ïa kito kiba kynthoh ïa ngi, ai ba kin kynthoh. Ki san tylli ki shympriah ‘ti kim long satia kiba ïalong katjuh. Kumta kin don kiba sngew tynnad ïa ka tem ka put, kin don ruh kiba don pat la ka jong ka jingsngew tynnad ha ki liang bapher-bapher.”
U Myntri u la pyntip ba ka tamasa Cherry Blossom mynta u snem ka la long kaba jop bad ha kaba la sakhi ka jingwan jong ki briew napoh bad nabar ka Jylla bad kumjuh ruh wat nabar ri.
