Agartala, Naiwieng:
U Myntri Rangbah ka Tripura, u Dr. Manik Saha, u la ong ba ka samoi treikam jong ka UPA ka dei kaba la jyllei da ki kam bamsap bad ki kam thok kiba jur, da kaba pynskhem ba ka BJP ka la pynkhreh ban thaw ïa ka sorkar ban wan ha West Bengal ban pynkut noh ïa kaei kaba u la batai kum ka “jingsynshar riewkhlaw.”
U la kren ïa kane ha ka prokram ha Takarjala kaba hap hapoh jong ka West District, ha kaba 135 ngut ki nongthep vote na ki 42 tylli ki longïing ki la pynïasoh sha ka BJP.
Haba pdiang sngewbha ïa ki dkhot ba thymmai, u Dr. Saha u la ong ba ki la shim ïa ka rai kaba dei ha ka por kaba biang, kaba u ngeit kan nang pynkhlaiñ shuh shuh ïa ka seng. U la pynpaw ïa ka jingpynheh ïa ka BJP ha kylleng ka ri India, da kaba kdew ba ka seng mynta ka dang thaw sorkar ha kiba bun ki jylla.
U la ai khublei ïa ka jingïalam jong u Myntri Rangbahduh u Narendra Modi na ka bynta ban pynïaid ïa ki jingthmu na ka bynta ka bha ka miat na ka bynta ka jaitbynriew, ka thaiñ Shatei-lam-Mihngi, bad ki jaidbynriew Janajati, kynthup ïa ka jingthaw ïa ka DoNER Ministry ban pynsted ïa ka jingroi jong ka thaiñ.
Haba pyrkhat ïa ka jingsynshar hapoh ka UPA, u la ong ba ka ri ka la mad ïa ki katto katne ki jingshah thok bad duna ïa ki nongïalam kiba khlaiñ. Pynban, u la ong ba ka sorkar u Modi ka la pynthikna ïa ka jingshngaiñ ka ri bad pynkhlaiñ ïa ka ri. “Shwa u snem 2014 ka la don ka jingkulmar ha kylleng ka ri, kynthup ha ka thain Shatei-lam-Mihngi. Hynrei hadien u snem 2014 baroh ki la kylla”, u la ong.
U Dr. Saha u la ther ruh ïa ki katto katne ki kynhun ha Tripura kiba la kynnoh ba ki ïalam bakla bad pynkhihwin ïa ki briew, da kaba kyntu ïa ki ha ka jaka ban pynïasoh ïalade sha ka BJP. U la ong ba ka seng ka angnud na ka bynta ka bha ka miat jong ki jaidbynriew riewlum bad kam ba ha ka por ba synshar ka CPIM, ka Tripura ka la sakhi ïa ka jingïathombor bad ka jingsyier. U la pynkut da kaba pynpaw ïa ka jingngeit skhem ba shen ka BJP kan sa thaw ïa ka sorkar ha West Bengal ban wanrah biang ïa ka jingsuk bad ban pynkut noh ïa ka “jingsynshar riewkhlaw.”
