Jowai, Naiwieng 20
Ka Khimusniang ka la khur jingjop ha ka Super Division Football Tournament (17th Kiang Nangbah Memorial Trophy) ba la pynïaid da ka West Jaiñtia District Sports Association (WJDSA), hadien ba ka la pynliem noh ïa ka Demthring da 2-1 kol ha ka sngi Palei ha Kiang Nangbah Stadium, Jowai.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang ha kaba kim shym la lah ban thep kol ha ka kylla step.
Dei ha ka kylla miet ba ka Demthring ka la ïoh ban pynkhih jar nyngkong lyngba u Mebakynsai Pale ha ka minit kaba 78. Hashwa ban wai ka Khimusniang ka la lah syndon ban thep pynphai kylla haduh ar kol lyngba u Dashngaiñ Sukhlaiñ ha ka minit 87 bad u Alwin Dkhar (90+4) na ka bynta ban khur syndon ïa ka jingjop.
Lyngba kane ka nam jop ka Khimusniang ka dangbat ïa ka kyrdan ba hakhlieh da kaba kamai 12 point na ki saw sien ïakhun, katba ka Demthring ka dangsah ha ka kyrdan b-ar bad 10 point, bud sa ka Youth & Cultural Sohmynting (6 poiñ), katba ka Chutwakhu bad ka Mooknor Thadmuthlong kiba la kamai mar 4-point.
Kiwei pat ki kynhun kiba dangsah shatrai ki long ka 7 Wasa United (3 poiñ), katba ka Ladthadlaboh bad ka Nangbah Mulang, ki la kamai mar 2 poiñ.
Ka jingïalehkai ha ka sngi Thohdieng kan long hapdeng ka Chutwakhu pyrshah ïa ka Mooknor Thadmuthlong ha ka por 2 baje nohphai sngi.
