Raphael Warjri
Lada ki bynriew baroh ki lah ban peit markhmat ïa la ki parabynriew, khlem da khmied shaneng lane khlem da dem shapoh da kaba shu peit pyrshah mar ryngkat da ka mynsiem basngur, ka pyrthei kan long ka basuk basaiñ. Ki ktien ki long kiba synlar hynrei ki don ka saiñpyrkhat ka ba jylliew bad kaba suk ban sngewthuh da mano mano ruh bad katno tam lei lei lada pyntreikam ha ka jingim briew ba manla ka sngi. Haba khmied shaneng ki briew dei ïa ki ba ki pynsngew halade ba dei kiba kham khraw ka kyrdan, kham stad kham shemphang, kham bhadur bhadar lane kham heh ka spah ka phew bad kumta ter ter. Kita kiba mad ïa kata ruh ki lah ban sngew kumta, lada dei ba kham khraw kyrdan ka mih ka rukom pyrkhat ban peit ïa kiwei kham shapoh lane peitpoh. Lada dei ba kham stad kham shemphang ka mih ka rukom pyrkhat ban peit ïa kiwei kum kiba kham duna ka jingstad bad jingshemphang da ka ba peitpoh ïa ki. Lada kham bhadur bhadar ïa lade ka mih ka rukom pyrkhat ba kiwei ki kham sniew dur sniew dar ki long kiba kham hapoh ban peitpoh. Lada kham heh ka spah ka phew, khaiï pateng, kamai kajih ka mih ka rukom pyrkhat ban peit kham hapoh ne peitpoh ïa kiba duk ba raitoi. Hynrei kita baroh kim long ki ba ryntih ha kino kino ki briew bad kiei kiei baroh ki rukom kheiñ ki mih na ka janor briew.
Kiba stad ba shemphang ki lah ban dei kiba mala ka dur ka dar ne duna ka spah ka phew, kiba heh ka spah ka phew ki lah ban long kiba mala ka dur ka dar, kiba bhabriew ki lah ban long kiba duk ba raitoi bad kum kita ki rukom khleh ha ka jinglong jingman jong ki parabriew kin don hi ha ka imlang sahlang bad baroh kita ki mih na ka janor briew. Hynrei ka jingshisha ka long ba lada bhabriew ne sniewbriew, stad ne bieit, shemphang ne anna, riewspah ne duk ka mynsiem briew ha ryngkat ka doh ka met briew ki dei kajuh ki jynthaw ha pyrthei ba markatjuh. Ym dei kaba jynjar ban pyrkhat kumta hynrei ka jinglong briew ka kyntu hi ha la dohnud ban ñiew kham khraw ïa lade bad kham poh ïa kiwei lane ban ñiew kham poh ïa lade bad kham khraw ïa kiwei, ha kano kano ka bynta la ha ka kyrdan jong ka spah ka phew, ka jingnang jingstad, ka dur ka dar ne kano kano ka rukom long ba shimet jong ki bynriew. Lada iwei-pa-iwei na ki bynriew ki lah ban pyrkhat ba ka lyer ba ring mynsiem ka dei kajuh la ha kano kano ka kyrdan longbriew manbriew, tang katta hi ka la biang ba ka pyrthei kan long kaba suk ba saiñ. Ka um ka lyer ba baroh ki bynriew ki donkam ban bam ban dih ki dei kiba long shitylli, khlem da ïapher ba ki parabriew baroh ki donkam, la duk ne riewspah, la bhabriew ne sniewbriew, la stad ne bieit bad kumta ter ter.
Ka jingthmu ka long ba kaei kaba la thaw ka mariang dei kiba lah ban pyndonkam salonsar da ki bynriew shityllup, hynrei dei ki katto katne ki ba pynsniew pynjaboh ïa ka um bad ka lyer ba ka sa long bih ïa kiwei pat kiba pyndonkam lang. Ha kano kano ka jaka ba don bunjait ki briew kiba sngew ïapher iwei na iwei hynrei kin mad ïa ka juh ka lyer khuid ne lyer iwtung kaba don hangta ha ka juh ka jaka. Ym dei ba ka lyer khuid ka leit tang sha kiba bhabriew, bastad ne ba riewspah, hynrei ka lyer iwtung ruh kan leit kumjuh kumba ka beh sha kylleng. Kane ka dei kata ka rukom pyrkhat Khasi ba la ñiewkor bad pyrto naduh mynnor, hynrei mynta ka la shongper noh bad kylla rong ynda la tynneng ïa ka pyrkhat nongwei kaba lah ban phrung na ki dohlieh lane wat na ka niam Khristan ruh. Ka long kaei kaei ka ba ym lah ban len ba kum kita kiei kiei ki jia ha ka imlang sahlang haduh ba ha ki shnong ki thaw ki phiah kyntoit hapdeng kita ki shnong ne chnong bad kita ki mishon ne Khristan, bad ki lyndet noh ïa ka longbynriew manbynriew ka ba long salonsar ban ring mynsiem da kajuh ka lyer ka ba pynkhie-im ïa baroh ba ki dang ïaineh ban dang im katba ym pat dkut u saihukum.
Lada khmih kham shajngai lei lei yn shem ba ka pyrkhat Khasi ka kham jylliew shuh shuh haduh ba kata ka snap longblei ka kdup ïa baroh ki jynthaw naduh ki phlang ki kynbat, ki dieng ki siej, ki khlaw ki btap, ki mrad ki mreng, ki sim ki doh, ki dohkha dohpnat, ki khñiang ki ksiah, ki wieh ki ksaiñ bad kumta ter ter. ïa kata lah ban bishar na ka duwai ka phirat blei haba la ju nam A Blei, U Blei, Ka Blei, Ki Blei. Kane ka rukom pyrkhat Khasi ka phalang ba kata ka longblei ym dei da u jynthaw ba lah ban iohi ne twad ki briew, ym don dur don dar, ym don met tylli bad ym don kano kano ruh ka rukom ha ka pyrkhat briew namar ba kata ka longblei ka dei ka maïan bah ka ba khraw palat liam ba ym lah ban khajoh da ka pyrkhat ka janor bad jabieng briew. Kata ka longblei ym dei ban kam ba dei kynthei ne shynrang lane ym dei marwei ne shibyllien, ka dei ka maïan blei ba palat liam na kiei kiei baroh ha shityllup ka pyrthei ba ym don jingthew ba lang ban tynjuh da ka bor briew ne ka jabieng briew.
