Imphal, Naiwieng:
Ki pulit ka Manipur ki la kem ïa uwei u nongsynshar shnong halor ka jingkynnoh ba u don kti ha ki kam beaiñ ba ïadei bad u drok bad ki la pynjulor ïa kawei ka jaka rep syntiew poppy kaba heh ha ki ar tylli ki jingtrei ba kyrpang ha kylleng ka distrik Kangpokpi, la pynthikna ki heh sorkar ha ka 24 tarik u Naiwieng.
Ka kynhun ba la ïatreilang ka la kem ïa u Lunkhohao Kipgen uba la 43 snem ka rta uba dei u khliehduh jong ka shnong Gunphaibung kaba hap hapoh thanad Saikul ha ka jingkhynra ha ka shnong Bongmoul ha ka 23 tarik Naiwieng.
Ki nongtohkit ki la ioh kurup 986 gram u drok bad kawei ka mobile phone na kti jong u.
Ki pulit ki ong ba kane ka jingkem ka dei shi bynta jong ka jingpyrshang kaba dang ïaid shakhmat ban pynpra ïa ki network ba marjan kiba ïadei bad ka jingsam drok.
Ha ka sngi kaba hashwa, ki bor pahara kiba ïatreilang bad ka tnad Forest bad ka Narcotics Control Bureau ki la pynlong ïa ka jingpynjot kaba heh bha ha ki lum jong ka shnong Kotlen kaba hap hapoh thanat Kangpokpi. Ka jingtrei ka la pynkhuid kumba 41 akar ki jingthung poppy.
Ki kynhun ki la pynpra ruh ïa ki 23 tylli ki ïing rit ba la shna kyrpang bad ki la kurup khyndai tylli ki byrni thep sboh, 11 tylli ki pla dawai pynïap khñiang, saw tylli ki pla mluh bad ki tiar bapher bapher ba pyndonkam ban rep.
Ki heh sorkar ki la batai ïa kine ki jingpyntreikam ha kine ki ar tylli ki jaka kum ka jingshah pynshitom kaba khraw ia ka jingpynmih drok beain ha ka distrik.
