Shillong, Naiwieng 25
U Riborlang L Lyngkhoi u la khur ïa ka hat-trick kaba nyngkong eh ha ka lympung ïalehkai SSA Champions Cup 2025 ha kaba ka Shillong Lajong ka la lah ban pynliem noh ïa ka Mawkriah West da 6-0 kol ha ka sngi Ba-ar ha SSA Stadium kaba ha First Ground, Polo
Ha kane ka jingïalehkai jong ka Group-B, ka Nongkseh ka la shimpor haduh 90 minit ban pynliem ïa ka Laitkyrhong da 1-0 kol bad kane ka la wan urlong lyngba ka corner ba la shut da u Hardy Cliff Nongbri (90), hynrei ka Lajong ka la lah ban thep kol lyngba u Riborlang (25, 28 & 39), katba ïa kiwei pat la pynbud da u Ricky Kharkongor (74), Willbeson Jaba (88) bad u Samchaphrang Lato (90).
Watla ka Nongkseh ka la khmih lynti ban bteng biang ïa ka jingjop kumba ka la lah ban jop haduh khyndai kol bad ban rah nam lahduh ha ka First Division, pynban ha kane ka jingïakhun ka la shem jingeh na ka daw ka jingïashan tyngeh ka Laitkyrhong, kaba la wan ba-ar ha ka Second Division.
Kumba ka paw ka Nongkseh ka la ïoh bun tylli ki kabu ksiar lyngba u Kynsaibor Lhuid ha ka jingpyrshang jong ka minit kaba 18 hynrei ka shah khanglad noh ha u rangapkol ka Laitkyrhong u Honesstar Khyriem, bad u Chesterpaul Lyngdoh um shym la lah ban thep kol.
Kumjuh Honesstar u la lah ban khanglad na ka jingpyrshang u Hardy ha ka kylla step, katba ka jingpyrshang u Kitboklang Pale ka la long shabar ha ka minit kaba 32. Kumjuh ka Laitkyrhong ka la ïoh ïa ki kabu kiba biang lyngba u Mebanrikupar Rynjah ha ka minit kaba 24 ha kaba u rangapkol ka Nongkseh u Daraphun Talang u la lah ban pyllait na ka jingshah thep.
Hynrei hashwa ban wai u Hardy u la ïoh ïa ka kabu kaba biang eh ha ka minit kaba 90 lyngba ka corner.
Haba phai sha kawei pat ka jingïalehkai, ka Lajong ka la lah ban pynjem khnap ïa ka Mawkriah West, kaba wan ba-ar ha ka Third Division, ha kaba ka la thep lai kol ha ka kylla step. Ha kajuh ka por kane ka long ka jingjop kaba 12 sien ïa ka Lajong kaba la wan ba-ar ha ka SPL ha kaba kam pat shym la shah rem ha kane ka lympung ïalehkai mynta ka aïom.
Kane ka lympung kan bteng biang ha ka sngi Palei da ka jingïalehkai jong ka Group-A. Ka Umlyngka (kaba la shah rem da 2-0 kol ha ka Langsning) kan ïakynduh pyrshah ïa ka Meghalaya Police ha ka por 1 baje mynsngi, ha kaba yn bud pat sa ka jingïakhun hapdeng ka Mylliem Lum (kaba la ïakhaid pyrshah ïa ka Mawkasiang) ïa ka Langsning ha ka por 4:30 nohphai sngi.
