Imphal, Naiwieng:
Ka jingïaid bteng ïa ki jingbuddien bad jingkhynra ba la pynlong da ki kynhun wadbniah ha kylleng ka Manipur ka la pynlong ban ïohkem ïa uwei u lehnoh bad ka jingïoh kurup ïa ka jaka buh tiar kaba heh bha, kaba pyni ïa ka jingpynkhlaiñ ïa ka jingpahara ha ka jylla.
Ki pulit ka Manipur ki la kem ïa uwei u dkhot jong ka KCP (PWG) ha ka 24 tarik Naiwieng na Chandranadi Lamkhai ha Imphal West. Une u briew u dei uba la tip kyrteng kum u Ronaldo Thoudam uba la 23 snem ka rta uba la tip ruh kum u Lamjingba bad u dei uba sah ha Haoreibi Mayai Leikai. Ki tyllong khubor na ki pulit ki la ïathuh ba kane ka jingkem ka long hadien ka jingpahara kaba thmu ha ki jaka ba la buh dak ba dei jong ki bynta ba ju don ne ba ju leit ju wan da ki lehnoh.
Ki bor pahara ki la pynjur ïa ki jingbuddien ha ka 25 tarik u Naiwieng, da kaba pynlong ïa ki jingkhynra ha ki jaka bapher bapher. Ka jingkhynra ïa ka shnong Songlung kaba hap hapoh ka Kangchup Police Station ha Kangpokpi distrik ka la pynlong ïa ka jingïoh kurup ïa kiba bun ki tiar ïasiat.
