Agartala, Naiwieng:
U Myntri Rangbah ka Tripura, u Manik Saha, ha ka lah sngi U Blei, u la pynbna ba ka sorkar jylla, ka la pynlong ïa ka jingpynrung kam kaba heh ban pyndap ïa ki 1,733 tylli ki kam hikai ha kylleng ki kyrdan bapher bapher, da kaba thmu ban pynkhlaiñ ïa ka tnad pule puthi.
Haba kren ha kawei ka jingïalang jong ka sorkar, u Saha u la ong ba ka bor synshar ka la dep pynrung 6,998 ngut ki nonghikai bad ki nongtrei ba ïatreilang naduh u snem 2018.
Haba pyrshah ïa ki jingkynthoh halor ka jingthaw kam thaw jam, u la kdew ba 20,181 ngut ki samla bym don kam ki la ïoh kam sorkar ha kajuh ka por, katba haduh 5,000 ngut kiwei pat ki la ïoh kam da ka jingïateh kular.
“Ka rukom thung kam ka pyni ïa ka jingangnud jong ngi ban ïaleh pyrshah ïa ka jingkyrduh kam. Kan ym don kano kano ka jingïapynbeit ha kaba pyndap ïa ki kam ba lait kiba kongsan ha ka pule puthi, ka koit ka khiah bad ka jingbha jingmiat ha ka ïing ka sem”, la ong u Myntri Rangbah ka Jylla.
Haba kam ba ka rukom thungkam kaba khuid bad kaba hok hapoh ka sorkar ba la ïalam da ka BJP, u Saha u la pynskhem ba ka jinglong khuid mynta ka dei ka dak jong ka jingpynrung kam ha Tripura, ym kum ha ki por ba mynshuwa.
