Agartala, Naiwieng:
Ki la jan don 2.5 lak ngut ki nongrep ha Tripura kiba la ïoh ïa ka pisa kaba la lum lang na ka skhim Pradhan Mantri Kisan Samman Nidhi (PM-Kisan) naduh ba la sdang ïa ka, ong u Myntri ka tnad Agriculture and Farmers Welfare u Ratan Lal ha ka sngi Palei.
Haba kren ha ka jingrakhe plie ïa ka tamasa ba la tip kum ka Orange Festival, u Nath u la ong ba ïa ka bhah kaba 21 jong kane ka skhim dang shen la sam sha ki nongïoh myntoi ha kylleng ka jylla. “Baroh kata T.900 klur la pynpoi beit beit sha ki Bank Account jong ki 2.5 lak ngut ki nongrep ha Tripura naduh ba la sdang kane ka skhim”, la ong u Myntri ka tnat ba dei khmih.
U Myntri u la ong ba ka rep ka riang ka dang long u budlum jong ka ïoh ka kot jong ka jylla, kaba noh synñang 46 percent na ka jingmih baroh kawei. “Ka rep ka riang ka dei ka bynta ba kongsan jong ngi. Ka kam jngohkai pyrthei bad ka kam khaïi ryngkat ka synñiang ba 41 percent, bad kaba sah 13 percent la pynmih na ki karkhana. Dei na kane ka daw ba ka rep ka riang, ka jingpynmih bording, bad ki khlaw ki btap ki dang long ki bynta ba kongsan jong ngi,” u la bynrap.
Haba pynpaw ïa ki jingkiew ha ka liang ka rep ka riang, u Nath u la ong ba ki nongrep jong ka Tripura ki pynmih ïa ki soh kiba bha kum ki sohñiamtra, ki soh jew, ki piat bad kiba bun ki rukom sara tynrai phan.
U la ong ba ka jingrep sohñiamtra ka la nang kiew bha ha kylleng ki distrik ha kine ki snem ba la dep.U Nath u la ong ruh ba ka Tripura ka la pyni ïa ka jingkiew kaba pawnam ha kaba pynurlong ïa ki thong jong ka roi ka par.
“Ngi la palat ïa ki 17 tylli ki jylla ha ka jingtreikam jong ka SDG. Ha ki hynñiew snem jong ka jingsynshar jong ka BJP ha kane ka jylla kaba rit, ïa ki jingmih na ka jingpyrshang jong ngi la ithuh ha ka ri baroh kawei. Ka NITI Aayog ruh ka la ai khublei ïa ki jingjop jong ka jylla,” u la ong.
