Guwahati, Naiwieng:
Ka la mih ka jingrisa shadkmen kaba khraw ha Margherita Tea Estate ha ka 28 tarik Naiwieng, kumba la sakhi, ha ka sngi Thohdieng, hadien ba ki nongtrei ka kper slasha kiba la peit ïa ka Live Telecast jong ka Assam Legislative Assembly, ha kaba u Myntri Rangbah ka jylla u Himanta Biswa Sarma bad u Myntri ka tnad Labour Welfare, Tea Tribes and Adivasi Welfare Assam u Rupesh Gowala ki la pynbna ïa ka rai ban ai ïa ki dulir sha ki nongtrei kper slasha ha kylleng ka jylla Assam.
Kham hadien katei ka jingpynbna, ki nongtrei jong ka Margherita Tea Estate ki la ïalumlang ha madan Top SideField, da kaba shad, rwai, bad pynbthei ïa ki bom pataka ban pynpaw ïa ka jingkmen jong ki halor kaei kaba ki la batai kum ka sienjam ka ban don ha ka histori bad kaba ki la ap slem bha.
U Harinanda Gorh, u Secretary jong ka Assam Chah Mazdoor Sangha (ACMS), Margherita Branch, u la ong ba kane ka rai ka dei ka por kaba kongsan ha ka histori ba 200 snem jong ka karkhana slasha ha Assam.
“Ha ka sien kaba nyngkong, ka jingnoh synñiang jong ki nongtrei kper slasha ka la ïoh ïa ka jingithuh kaba pura. Ngi sngewnguh shibun eh ïa ka jingïalam bashlur jong u Myntri Rangbah ka jylla bad u Myntri u Gowala na ka bynta ka jingwanrah ïa kane ka aiñ ka ban pynbiang ïa ki dulir khyndew sha ki nongtrei kper slasha,” la ong u Gorh, ha kaba u la bynrap shuh shuh, ba ki nongtrei kper slasha ki la pynpaw ka jingsngewnguh shi katdei ïa ka sorkar hapoh ka jingïalam jong ka seng BJP ha baroh ar, kata ha ka sorkar pdeng bad ka sorkar jylla.
Katba ka jingrakhe ka dang ïaid shakhmat, ki nongtrei ki la pynmih ïa ki jingpyrta ban ïaroh ïa u Myntri Rangbah duh ka ri u Narendra Modi, u Myntri Rangbah ka Jylla u Himanta Biswa Sarma, u Rupesh Gowala u Myntri ka tnat ba dei khmih, u MLA ka Margherita u Bhaskar Sharma.
La khmih lynti ba kane ka rai kan don ka jingtreikam kaba pynkylla ïa ka imlang sahlang jong ki kynhun ki nongrep slasha, kiba la dawa slem bha ïa ka hok halor ka jaka puta.
