Imphal, Naiwieng:
Ka bor pynïaid jong ka Chandel distrik, ha ka 28 tarik u Naiwieng, ka la pynlong ïa ka prokram ai jinghikai da ki kti ïa ki pulit distrik halor ka jingpyntreikam ïa ki kor Biometric kum shi bynta jong ka jingtreikam kaba dang ïaid shakhmat ban pynrung kyrteng ïa ki briew kiba wan rung be-aiñ.
Ka dorbar kaba la pynlong ha ka Conference Hall jong ka ophis jong u Deputy Commissioner, ka long hapdeng ka por ba kiew bha ka jinglap ïa ki nongwan rung beaiñ ha ki katto katne ki distrik khappud jong ka Manipur, kynthup ka Chandel.
U Deputy Commissioner Chandel u Laishram Nandakumar (IAS) u la ong ba ka distrik, kumba long kiwei pat ki thaiñ khappud jong ka jylla ka la sakhi ïa ki jingjia ba bun jong ki jingrung beaiñ jong ki briew ba nabar. U la kdew ba katkum ki jingbthah bathymmai jong ka Ministry of Home Affairs (MHA), mynta ka jingpynrung kyrteng lyngba ka jingpyndonkam da ki kor Biometric ka long kaba donkam na ka bynta baroh kum kine ki briew shwa ban beh noh ïa ki.
Katba ka rukom treikam kaba mynshuwa ka shaniah ha ki kot ki sla kiba paw ha ka met, ki jingbthah ba la pynthymmai ki dawa ba ïa ka jingtreikam jong ka Biometric baroh kawei dei ban pynlong online. Shisien ba la dep ban pynrung kyrteng, ïa ki jingtip ba bniah jong ki bar jylla yn sa thep ha ka MHA’s Foreigners Identification Portal na ka bynta ban pynshisha ïa ka jinglong trai ri bad ka jaitbynriew jong ki.
U Deputy Commissioner u la kdew ruh ïa ki jingeh ba lah ban pyntreikam ïa ka jingbthah ha ki jaka khappud ba jngai, kiba bun na ki kim don ka jingpynïasoh Internet kaba biang. U la ong ba dang pan jingïarap na ki shipai Assam Rifles ban pynbiang ïa ka Internet ha kitei ki jaka ban pynthikna ba yn lah ban pyndep ïa ka jingpynrung kyrteng Biometric khlem da pynslem.
Ka jinghikai kaba la long ha ka sngi Thohdieng, ka don jingthmu ban pyntbit ïa ki pulit ka distrik da ka jingstad ba donkam ban pynlong ïa ka jingpynrung kyrteng Biometric kaba shu online da kaba paka bad ban pynkhlaiñ ïa ka jingpynkhreh jong ka distrik ha kaba pynïaid ïa ka jingithuh bad jingthoh ïa ki kot ki sla jong ki nongwan rung be-aiñ.
