Agartala, Naiwieng:
Ki pulit ka Tripura ki la kurup 547 kg u jingdih pynbuaid ba la suba ba dei u drok ha Dhalai.La bat ar tylli ki kali kiba kit ïa ki mar ba la khang pyrshah. La kem ïa lai ngut ki suba hapoh ka aiñ NDPS.
Ki ophisar jong ki pulit ka Tripura ki la pynlong ïa ka jingkhynra kaba khraw mynta ka sngi ha Purnajoy Para ha Dhalai distrik, ha kaba ki la ïoh ban kurup kumba 547 kg u jingdih pynbuaid ba la suba ba la thad tyrkhong. Ïa kane ka jingleh la ïalam da u SDPO Ambassa uba hap hapoh ka jingpeit jong ki pulit ka Ganganagar Police Station. Ki bor pynïaid ki la ithuh bad bat ïa ar tylli ki kali kiba la ïathuh ba ki kit ïa katei ka mar ba la khang ha ka por mynstep, kumba 3 baje eiei.
Ha kane ka jingkhynra, ki pulit ki la ïoh ban kurup ïa une u jingdih pynbuaid uba la suba ba u dei u drok na kawei ka Hyundai Venue kaba don ïa u number TR 01A 0759 bad kawei ka kali Tata Harrier kaba don ïa u number TR 01CA 0763.
Ïa kine ki kali la bat mynta kum ki sakhi sabut ha ka jingtohkit kaba dang ïaid shakhmat.
La kem ïa lai ngut ki briew ha katei ka jaka kum ki suba donkti ha kaba ïadei bad ka jingkit ïa utei u jingdih pynbuaid. Ki pulit ki la sdang ïa ka jingtohkit kaba pura pyrshah ïa ki kum shi bynta ban pyntreikam Narcotic Drugs and Psychotropic Substances (NDPS) Act.
Ka mukotduma kaba kyrpang katkum ka aiñ NDPS ka la don jingthoh ha thanat Ganganagar.
Ki bor pynïaid ki pynthikna ba ka jingtohkit ka dang ïaid shakhmat ban pynthikna ïa ka jingheh jingrit jong katei ka jingtreikam bad ban lap ïa kino kino ki briew kiba lah ban donkti.
