Guwahati, Naiwieng:
Ka Assam ka la paw ba ka la nangkiew stet bha kum kawei na ki jylla ba jakhlia tam ha India, ha kaba shiphew tylli ki distrik jong ka ki don hapdeng ki 50 tylli ki jylla ba jakhlia tam ha ka ri, katkum ka jingkhmih bniah ïa ka PM2.5 da ki Satellite ba la pynlong ha kylleng ki jaka rung, ki jylla, bad ki distrik jong ka India.
Ka jingwad bniah jong ka Centre for Research on Energy and Clean Air (CREA), ka seng wadbniah kaba laitluid, ka la lap ba ka Delhi bad ka Assam ryngkat lang ki don jan shiteng na ki 50 tylli ki distrik kiba la jaboh bha, bud sa ka Bihar bad Haryana kiba don hynñiew tylli ki distrik.
Kiwei pat ki jylla kiba don ki distrik kiba don ha ka top 50 ki kynthup ïa ka Uttar Pradesh (4), Tripura (3), Rajasthan (2), West Bengal (2), bad kawei kawei ka distrik naduh Chandigarh, Meghalaya, bad Nagaland.
Katto katne ki jylla ki don ha ka jingbym kohnguh pura ïa ki kyndon jong ka jinglong ka suiñbneng (NAAQS), ha kaba baroh ki distrik ba la buddien ki palat ïa ka jingdon jong ka PM2.5 kaba la shah.
Kine ki kynthup ïa ka Delhi, Assam, Punjab, Haryana, Chandigarh, Himachal Pradesh, Meghalaya, Tripura, bad Jammu bad Kashmir.
Ha Assam, baroh 34 tylli ki distrik ba la buddien ki la palat pud ïa ka NAAQS ha u snem 2024.
Ka kaiphod ka la kdew ba ka Assam, Delhi, Punjab, bad Tripura ki ju palat ïa ka jingthew jong ka PM2.5 ha baroh shisnem, kynthup ha ka por slap, ha kaba ka jinglong ka lyer ha ka jingïalang ka kham bha ha kiwei kiwei pat ki bynta jong ka ri India.
Ha kane ka por Lyiur, ki don 21 tylli ki distrik ha Assam, 9 tylli ha Delhi, 15 tylli ha Punjab, bad 6 tylli ha Tripura ki la tam ia ki pud ba la buh.
Ka jingpule ka la pynpaw ïa ki jylla jong ka thaiñ Shatei-lam-Mihngi, khamtam eh ïa ka Assam bad Tripura, kum ki jaka ba jur bha ka jingjaboh kaba khlem khmih lynti, kaba paw ha ki phra tylli ki distrik kiba pawnam na ka bynta ka jingjaboh ha kylleng ki aiom Tlang, Lyiur bad slap.
Ka CREA ka la ai jingmut ba ki jylla kin thaw ïa ki plan treikam na ka bynta ka jinglong ka suiñbneng ha ka kyrdan jong ki distrik da kaba pyndonkam ïa ki jingtip na ki Satellite ban ithuh ïa ki jaka ba don ka jingshah ktah kaba jur, ban buh hakhmat eh ïa ki paidbah kiba rit paid, bad ban mang ïa ki lad ban pynduna ïa ka jingma ha ka rukom kaba biang.
Ka kaiphod ka la pynksan ban pynbeit ïa ki tyllong kiba kongsan jong ka thaiñ, kynthup ïa ka jingpynmih bording, ki kam karkhana, ka jingthang ïa ki marpoh khyndew, bad ka jingkit jingbah, ban pynduna ïa ka jingjaboh PM2.5 kaba neh ha Assam bad ha kylleng ka Indo-Gangetic Plain.
