Imphal, Nohprah:
Ki bor pahara jong ka India ki la lap ïa ka kynhun khaïi tiar ïasiat ba la kynnoh ba ka don ka jingïadei bad ki nongsam tiar ïaleh pyrshah kiba don ha Myanmar, da kaba kem ïa saw ngut ki runar ha kaba la kurup ïa ka pisa kaba T.57.77 lak.
Kine ki briew kiba la shah kem ki dei ki dkhot jong ka jaitbynriew Kuki-Zo kiba shong basah ha ka thaiñ Shatei-Mihngi jong ka Kangpokpi bad Senapati distrik jong ka Manipur.
Katkum ka khubor ba la pynmih da ki pulit ka Manipur ha ka lah sngi U Blei, la ïathuh ba ïa kane ka jingkem bad ka jingkurup la leh ha ka por ba don ka jingkhynra kaba kyrpang ha Phaikoh Outpost kaba hap hapoh ka Chassad Police Station ha Kamjong distrik, hajan khappud ka Myanmar, ha ka 28 tarik, Naiwieng, 2025.
Ha katei ka jingkhynra, la ïoh ban kurup haduh 20 song ki pisa India, kiba don ha ki lut T.500, na ka Mahatma Gandhi New Series, kaba dei ka jingïoh kurup pisa kaba bun tam ha Manipur haduh mynta.
Da kaba leh katkum ka jingtip na shiliang pud Myanmar ba la suba ba ki lehnoh ki lah ban donkti ha ka jingkhaïi tuh ïa ki tiar ïaleh sha shiliang pud, ki bor pahara ki dang long kiba husiar bha.
Ki dang pyntreikam ïa ka Military Vehicle Check Post (MVCP) ha ka thaiñ Kamjong kaba don ha ka jaka ba don jingma ha ka por ba ki jingkem ki la jia.
Kine ki saw ngut kiba la shah kem ki dei kiba la tip kyrteng kum u Nengneihoi Khongsai (24) jong ka Seijang, Senapati distrik, Mangminthang Haokip (29) jong ka shnong C Asian Senapati distrik; Mangjoithang Haokip (27) jong ka shnong Seijang, Senapati distrik; bad u Lempu Khongsai (39) jong ka shnong Nengboi, Kangpokpi distrik.
