Shillong, Nohprah 04
Ka Arsenal ka la wanphai ka jingjop ha ka Premier League, hadien ba ka la pynliem noh ïa ka Brentford da 2-0 kol bad ban tam da 5 poiñ ha ka step jong ka sngi Palei, katba u Arne Slot u la don ha ka jingeh hadien ba ka Liverpool ka la ïakhaid mar 1-1 kol bad ka Sunderland ha Anfield.
Kane ka kynhun jong u Slot ka la don ha ka jingeh hadien ba ka la don ha ka kyrdan ba phra hadien ba u Mohamed Salah um shym la ïoh ban mih madan naduh kaba sdang bad kane ka la ktah ïa ka kynhun.
“Kane ka paw shai ba ki kynhun kiba ïalehkai bad ngi mynta ki pyrkhat ba ki lah ban ïoh ïa ka jingmih,” la ong u Slot.
Ha kawei pat ka liang ka Chelsea ka la hiar sha ka kyrdan ba saw bad duna 9 poiñ ïa ka Arsenal, kaba la pynjlan ïa ka jingïalehkai khlem shah rem ha baroh ki 18 tylli ki jingïalehkai bad ka dangkhmih lynti bha ban ïoh ïa ka nam lahduh ha kane ka kynti kaba mynta.
Ka jingkhlaiñ jong ka Arsenal ha ka jingjylliew ka la paw ha ka jingjop da kaba suk ïa ka Brentford kaba la pynneh ïa ka rekod kaba khlem shah rem jong ka ha Emirates Stadium mynta ka samoi.
Katei ka kynhun ka la long khlem ki rangïaleh -kai shapdeng kum u Gabriel Magalhaes bad u William Saliba namar ka jingmynsaw, katba u manager u Mikel Arteta u la jied ïa ki khlur ïalehai kum u Bukayo Saka, Jurrien Timber bad u Eberechi Eze ba kin shong ben.
Ki arngut na ki nongïalehkai ‘dien ki la ïasoh lang na ka bynta ban sdang ïa ka kol ha ka minit kaba 11, ha kaba u Mikel Merino u la thep da ka khlieh ïa ka bol kaba la pynbuh da u Ben White, hashwa ba u Saka un thep ïa ka kol kaba ar hashwa ban kut ka jingïalehkai.
U Manager jong ka Chelsea, u Enzo Maresca, um shym la don satia ka jingkmen halor ka jingshah rem ha Leeds da 3-1 kol, kaba la jia tang hadien lai sngi hadien ba ka kynhun jong u kaba 10 ngut, ka la ïakhun tyngeh ban pynlong ïa ka Arsenal ban ïakhaid da 1-1 kol.
“Ka long ka miet kaba sngewsih, ka Leeds ka dei hok ban khur jingjop ha kane ka jingïalehkai namar ki la lah ban ïalehkai bha ha baroh ki liang,” la ong u Maresca.
