Shillong, Nohprah 04
Ka Junior Women’s Selection Committee jong ka Meghalaya Cricket Association (MCA) ka la pynbna ïa ki kyrteng jong ki 15 ngut ki ‘thei ïalehkai ryngkat bad ki 5 ngut kiwei pat kiba la pynap lypa (standby), ban ïashim bynta ha ka lympung ïalehkai jong ka BCCI, ka U-19 Women’s One Day Trophy 2025-26 plate group.
Kane ka lympung ïalehkai kan sdang naduh ka 13 tarik mynta u bnai Nohprah, ha kaba ka Meghalaya kan ïakhun pyrshah ïa ka Tripura, kaba la buh ban long ha Nagpur, kiwei pat ki kynhun ba la don lang ha kane ka thup ki long ka Arunachal Pradesh, Manipur, Mizoram bad Sikkim.
Haba pynbna ïa ki kyrteng jong ki ‘thei ïalehkai, ka MCA ka la pynbna artad ruh ïa ka kapten ka kynhun kaba mynta ka kynti la bynshet ha ka Fennysha Nongrum, katba ka Cheanchi Kambesa Sangma ka la shah jied kum ka vice-captain bad u coach u dei u Bah Bhakupar Mylliemngap.
Ka jingpynkhreh ïa kane ka kynhun kan sdang naduh ka 5 haduh 9 tarik mynta u bnai ha madan ïalehkai ka RBDCA, Pahamsning, Nongkhrah bad ka kynhun kan mih na la ïing ha ka 10 tarik mynta u bnai.
Ki kyrteng ki ‘thei ïalehkai ki long ka Monica Singh, Ronjoli Basumatary, Fennysha Nongrum (C), Jayshree Singh, Cheanchi Kambesa Sangma (VC), Banchila R Marak, Beneros D Shira, Shreya Marak, Dejianna M Sangma, Joanna Pyngrope, Steffinie Sohshang, Yoolang Suting, Jennifre Fancon, Chigesanora Marak, Eliza Lyngdoh. Katba kiwei pat kiba la pynap lypa ki long ka Isha Ray, Julitha Sangma, Rosabel L Lyngkhoi, Namesha A Marak bad ka Rafinia Ryntathiang.
Ki nongïarap ki long u Bah Bhakupar Mylliemngap (head coach), Overjoy Lyngkhoi (assistant coach), Lucky Mary Marbaniang (physio), Helyna D Sangma (trainer) & Phibakordor Diengdoh (manager).
