Moscow, Nohprah:
U President ka Russia, u Vladimir Putin, ha ka Sngi Palei u la ong ba ka Russia kan knieh da ka bor ia ka nongbah Donbas jong ka Ukraine lada ki shipai ka Ukraine kim mih bad pyndem hi noh da lade na katei ka nongbah. Kane ka jingkam trai jong ka Russia ia katei ka nongbah, ka dei kaba la pyrshah jur da ka Ukraine bad ong ba dei ki shipai jong ka Ukraine hi kiba dang bat ia ka bor synshar ha katei ka nongbah tad haduh kine ki sngi.
U Putin, u la phah da ki phew hajar ngut ki shipai sha Ukraine, ha u bnai Rymphang jong u snem 2022, hadien 8 snem jong ka jingiakhun, hapdeng ki riew pyniakhlad, ba la kyrshan da ka Russia bad ki shipai jong ka Ukraine, ha Donbas, kaba la pynlong da ki thain Donetsk bad Luhansk.
“La ngin shu knieh hi noh da ka bor ia katei ka nongbah, lane ki shipai Ukraine kin mih noh na kine ki bynta kiba la hap hapoh ka jingsynshar jong ka Russia”, la ong u Putin ha ki nongthoh khubor shwa ba un leit sha New Delhi, katkum ka video kaba la pyni ha ka telebishon jong ka sorkar Russia ha katei ka sngi.
Katba na ka liang jong ka Ukraine pat, ka la ong ba kam lah ban shu ai sngewbha ia ka Russia, ia la ki jong ki bynta kiba don hapoh u pud- u sam jongka, kaba ka Russia ka lah ban long ka nongjop ha kane ka thma bad une u President ka Ukraine, U Volodymyr Zelenskiy, u la ong ba ym dei ban ai lad ia ka Russia ba kan ioh ia katei ka nongbah namar kan sa long ka jingaibor ia ka ba kan lah ban knieh bad pynliem syndon noh ia ka Ukraine.
Ka Russia mynta ka la ioh synshar kumba 19.2% ha Ukraine, kynthup ïa ka thaiñ Crimea, kaba ka la pynïasoh ha u snem 2014, baroh kawei ka Luhansk, palat 80% jong ka nongbah Donetsk, kumba 75% ka Kherson bad Zaporizhzhia, bad ki bynta khappud jong ki thaiñ Kharkiv, Sumy, Mykolaiv bad Dnipropetrovsk.
Hynrei la ong ba kumba 5,000 square km (1,900 square mile) jong ka Donetsk ka dang sah hapoh ka jingsynshar jong ka Ukraine.
Ha ka jingiakren bad ka America halor ka lynti jong ka jingiateh jingsuk kaba lah ban long ban pynkut noh ia ka thma, ka Russia ka la ju ong bunsien ba ka kwah ban synshar ia ka Donbas baroh kawei – bad ba ka America ka dei ban ithuh khlem da thikna ia ka jingsynshar jong ka Moscow.
Ka Russia ha u snem 2022 ka la pynbna ba ki thaiñ jong ka Ukraine kum ka Luhansk, Donetsk, Kherson bad Zaporizhzhia mynta ki dei ki bynta jong ka Russia hadien ka jingjied paidbah ba ki ri Sepngi bad Kyiv ki la weng noh kum ka jingleh thok. Kiba bun ki ri ki ithuh ia ki thain – bad ia ka Crimea – kum ka bynta jong ka Ukraine.
U Putin, u la pdiang sngewbha ia ki nongmihkhmat jong ka America, U Steve Witkoff bad U Jared Kushner, ha Kremlin, ha ka sngi thohdieng, bad ula ong ba ka Russia, ka la pdiang ia ki katto katne ki jingtyrwa jong ka US, halor ka Ukraine, bad ba ka jingiakren, ka dei ban iaid beit shakhmat.
