Sri Lanka, Nohprah:
Ki nongshong shnong jong ka shnong Kithulbadde ha pdeng jong ka Sri Lanka, ki ong ba ki la shah iehnoh ha ka jingma hadien ka erlangthari kaba la pyniap briew ha ka taiew ba ladep, bad kiba bun ki sahkut ha ki jaka ai jingïarap, namar ki jingtei kiba la shah pynjulor, ki la pynlong ïa ki ban tieng ban leit phai noh sha la ki jong ki ïing ki sem.
Kumba 479 ngut ki briew, ki la iap ha katei ka erlangthari, kaba la wanrah ia ki lyer kiba jur bad ka jingshlei um kaba shyrkhei tam ha ka shi snem bad kaba la ktah ia 1.2 million ngut ki nongshong shnong jong katei ka ri. Sa 350 ngut pat ki dei kiba dang jah rngai haduh kane ka kynti katkum ka jingai jing-kheiñ jong ka sorkar.
Da ka jingksam jong ka erlangthari ia ki thliew kiba jylliew ha ka khyndew bad ki kynroh kiba la julor lut ha ki ïing ki sem, bun na kito kiba don ha ki jaka ai jingïarap ki la sahkut noh ha ka jaka ba ki don.
Kumta la ong ruh ba wat hadien ba katei ka erïong ka la sangeh, hynrei ki paidbah ki dap da ka jingsheptieng ban leit phai biang noh sha la iing, kim sngew shngaiñ shuh. Ia kane la phla da u Madulle-gedera Chandralatha, 57 snem ka rta, uba long u nongshong shnong jong ka Kithulbadde, ka shnong kaba itynnad bha kaba don hapdeng ki lum hapdeng ki kper sla-sha.
Ki don 1,289 tylli ki iing ha kylleng ka ri, kiba la shah pynjulor ha ka erlangthari Ditwah, katba 44,500 tylli pat, ki shah pynjulor shi bynta, katkum ka jingong jong ka sorkar, kaba dang lum ia ki jingtip ban ai ia ki “jingpynbeit kiba jrong por” sha kito kiba sah ha ki jaka ba don jingma.
Bun kiwei pat ki leh ia kajuh ka jingleit jingwan man ka sngi ban sumar ia ki jaka rep sla-sha bad ki jaka rep jhur jong ki, lane ban peit ia ki mrad ba ki ri, da kaba leit phai biang sha ki jaka sah ba shipor pat ha ka por myn miet.
Ka Dr. Gamini Jayati-ssa na ka National Building Research Organisation kaba la pyniaid da ka sorkar, ka la kyntu ia ki nongshong shnong ha ka Sngi Palei ban mih noh na ki jaka ba don ki jingtwa ha ka khyndew, da kaba maham ba u slap ba thymmai u lah ban wanrah ia ka jingtwa khyndew ha kine ki sngi ki ban wan.
