South Africa, Nohprah:
Ka South Africa ha ka Sngi Palei, ka la ong ba ka la pynkhreh ban ap haduh une u snem u ban wan ban iadon bynta ha ka jingialang G20 hadien ba ka US ka la khang noh ia ka na katei ka kynhun.
Ka United States mynta u bnai, ka la shimti ïa ka kam President jong ka kynhun jong ki ri kiba pawkhmat ha ka ïoh ka kot, kaba la neh shisnem, hadien ba ka la khanglad shibun ïa ka jingsynshar jong ka South Africa, kynthup ïa ka jingïalang jong u Nohprah, ha ka jingpynjur ïa ki jingthombor jong ka ïa ka nongbah Pretoria.
U Secretary ka sorkar jylla u Marco Rubio u la kren biang ha ka sngi thohdieng ba yn nym khot ïa ka South Africa sha ka G20 kaba la pynïaid da ka US, da kaba ong biang ïa ki jingujor ba kynthup ïa ki jingkynnoh ba khlem nongrim ba ka sorkar ka thmu ban lehbeiñ ïa ki jaidbynriew lieh Afrikaner kiba rit paid.
U nongaiktien jong u president ka jylla, u Vincent Magwenya, u la ong haba jubab ba ka South Africa kan shong ha ki jingialang ba bud jong u snem 2026 bad kan sdang biang ia ka jingiashim bynta ynda la aiti ia ka G20 sha ka ri Bilat hadien shisnem.
” Ia mynta, ngin shim ia ka jingsangeh ha ka kam khaii tad haduh ba ngin sdang biang ia ki prokram ba man ka sngi,” la ong u Magwenya ha ki social media.
Ka kynhun jong ki ri G20 ka kynthup ïa ki ri kiba don ha ka ïoh ka kot ha ka pyrthei bad kumjuh ruh ki ri kiba don ha ka thaiñ jong ka European Union bad ka African Union. Ka don 85 percent na ka GDP jong ka pyrthei bad ar bynta na ka lai bynta jong ka jingbun briew jong ka.
Ha kane ka jingialang bah ha Johannesburg, kaba dei kaba nyngkong eh ha Africa, la wan ban iashim bynta da shibun ki riew pawkhmat jong ka pyrthei, kynthup na ki ri, ki bym don ha ka G20, hynrei kiba la khang pyrshah da U Donald Trump, President jong ka US.
U nongaiktien jong u President Cyril Ramaphosa u la ong ba ka South Africa kam shym la khmih lynti ba kiwei pat ki ri jong ka G20 kin kyntait ïa ka jinglong president jong ka US lane ban ïasaid ban pynrung ïa ka.
“Ha ka jingshisha kan ym long kaba myntoi lada baroh shisnem kan shu jah rngai bad ka G20 kan kyllon noh”, la ong u Magwenya ha ka jingïakren bad ka kotkhubor Sunday Times kaba la pynmih ha ka por janmiet jong ka Sngi Balang.
Hynrei ka South Africa kan khmih lynti ba kiwei pat ki dkhot kin “register ia ka jingbym sngewtynnad jong ki bad ka US ban iada ia ka jinglong ba bun jait bad ka mynsiem bad ka jingthmu jong ka G20,” u la ong.
Ka sorkar Trump, ka la ther tyngeh ïa ka South Africa halor ki buit ki polisi, ha kaba ka la beh noh ïa u nongmihkhmat jong ka ha u bnai Risaw bad ka la pynjari ïa ka khajna khaii pateng kaba 30%, kaba ka Pretoria ka dang pyrshang ban pynkylla.
