Washington, Nohprah:
Ka Sorkar jong u Trump ha kane ka kynti, ka la pynpaw ba ka la ñiew ia ka India kum ka paralok ba kongsan ha ka National Security Strategy kaba dang shu pynmih thymmai, kaba pyni ia ka jingthmu jong ka US ban pynjylliew ia ka jingiatreilang bad ka India ha kiba bun ki liang ba ïadei bad ka ioh- ka kot, ki kam ba ïadei bad ka jingstad ‘technology’ jong kane ka juk ba mynta bad kumjuh ruh ha ka liang ka jingiada ri.
Ka kot jingthmu pyntreikam, kaba la pyllait paidbah da ka White House, ka khot shai ban pynbha ia ka jingiadei ha ka khaïi- pateng bad ka India bad ka pynshlur ia ka India ban “noh synniang sha ka jingshngaiñ jong ka Indo-Pacific” lyngba ka jingiatreilang ha ka Quadrilateral Security Dialogue ryngkat bad ka Australia, Japan bad ka United States.
Katei ka thup jong ki jingthmu bad jingpynbeit ba la dep pynpaw paidbah, ka la ithuh ia ka Indo-Pacific kum “ka la long lypa ka tynrai jong jan shiteng na ka GDP jong ka pyrthei” bad ka buh ia ka thaiñ kum kawei na ki “madan thma ba kongsan jong ka ioh ka kot bad ka sain pyrthei jong ka spah snem ban wan.”
Ki heh jong ka US ki la pynpaw shai ïa ka jingthmu jong ki ban ïatreilang bad ki paralok ba la ïateh kular–kiba ka ïoh ka kot jong ki baroh ka long $65 trillion–ban ïakhun pyrshah ïa kaei kaba ka kot ka batai kum ka “jingleh kamai kaba sniew” ha katei ka thaiñ.
Ka India, ryngkat bad ka jingroi ka ioh ka kot bad ka kyrdan ba kongsan jong ka, ka paw bha ha kane ka jingkhein jingdiah. Ka bor synshar ka la pynksan ïa ka jingïatreilang ha ka liang ka teknoloji, khamtam ha ka jingstad thymmai, ka jingkheiñ jingdiah bad ki teknoloji ïada ri, kum ki bynta ban pynkhlaiñ ïa ka jingïatreilang.
Kane ka kot ka pynskhem biang ïa ka jingkular jong ka US ban ïatreilang hapdeng ki saw tylli ki liang lyngba ka Quad, kaba la mih kum ka lynti treikam ba kongsan jong ka jingïadei bad ka jingïada ha ka Indo-Pacific.
Ka US ka shim ba ka jingpynlong kynhun ka long kaba donkam bha ban pynneh pynsah ïa kaei kaba ka khot ka “Indo-Pacific kaba laitluid bad kaba plie” bad ban pynneh pynsah ïa ka jinglaitluid jong ka jingïaid lynti ha ki lynti duriaw kiba kongsan.
Halor ki kam pahara, ka buit treikam ka batai ia ki jingthmu ban tei ia ka tnat shipai “kaba lah ban kyntait ia ka jingleh donbor ha kano kano ka jaka ha ka ïew ba nyngkong” katba ka khot ia ki paralok ban “kiew bad pynlut–bad kaba kham kongsan ban leh–kham bun na ka bynta ka jingiada lang.”
Ka kot ka kren ruh shaphang ka Taiwan bad ka South China Sea, lyngba kaba shi bynta na ka lai bynta jong ki lieng ha ka pyrthei ki ïaid man la u snem, kum ki jingeh ba kongsan na ka bynta ka jingshong shngaiñ ha ka thaiñ bad ka ïoh ka kot jong ka US.
Ka buit treikam jong ka jingïada ïa ka ri, kaba la ai kyrteng “Ka America Nyngkong,” ka pyni ïa ka jingphet noh na ki rukom treikam jong ki bor synshar ba mynshuwa, da kaba pynksan ïa kaei kaba ki heh sorkar ki batai kum ka jingïatreilang kaba “long shisha” kaba pynleit jingmut ha ki jingmyntoi ba kongsan jong ka US.
Ka India ka shem ba ka don ha ka kyrdan kaba biang ha kane ka phang, ha kaba ka buit treikam ka kyntait shai ia ki jingkhot ban pynkylla ia ka synshar paidbah ne ka imlang sahlang ha ki ri kiba iatreilang, ha ka jaka kata ka kyrshan ia ki jingiatreilang kiba la pynshong nongrim ha ki jingmyntoi ba iasam lang bad ka jingmyntoi lang.
Katei ka kot, ka pyni ia ka samoi treikam kaba ar jong U President Trump, kum ka juk jong ka “jingïadei kaba khlem riti”, da kaba dawa ïa ki jingïateh kular jingsuk lane ka jingsangeh thma ha ki katto katne ki jingïakynad kiba la slem bha, kynthup hapdeng ka India bad ka Pakistan. Ka buh ia kum kine ki jingthmu kum shi bynta jong ka jingpyrshang kaba kham heh ban “pynlip da ka surgery ia ki ding jong ka jingiapher hapdeng ki jaitbynriew kiba lah ban pyndonkam ia ki tiar nuclear” shwa ba kin sdang ban sdang sha ka thma kaba kham heh.
