Kyiv, Nohprah:
Katkum ki khubor, la ïathuh ba palat 70,000 ngut ki kynthei ki la leit ban pynïasoh ïalade sha ka tnat shipai jong ka Ukraine ha u snem 2025, kaba kiew da 20% ban ïa ka jingdon ki shipai ka Ukraine ha u snem 2022, ha kaba palat 5,500 ngut ki la phah sha ka laiñ ba shakhmat.
La ïathuh ba katei ka jingkiew, ka dei namar ka jingstad jong ka juk mynta, khamtam eh ki drone, kiba la thaw ïa ki lad ïakhun thma bad ki lad jingstad na ka bynta ki kynthei, kiba mynshuwa kim ju don ha ka kam shipai.
Kane ka jingleit pynïasoh jong ki kynthei sha ka kam shipai, ka long ruh ha kane ka por ba ka Ukraine ka mad ïa ka jingduhnong kaba khraw. Ha ki khyndiat por ba la leit, u President ka Ukraine- u Volodymyr Zelensky, u la antad ba kumba 45 hajar ngut ki shipai Ukraine ki la ïap bad ym duna ïa ka 390 hajar ngut ki la mynsaw naduh ka por ka jingleit hiar thma ba pura jong ka Russia ha u snem 2022.
Hynrei la ong ba ka jingïakhun thma da ki ‘drone’, ka la ailad ïa ki kynthei ban ïadon bynta ha ki kam ïakhun thma bad ban ïakhun da ki rukom jong kane ka juk stad ba mynta, khlem da ïashim bynta da ka met jong ki ban ïakhun thma pyrshah ïa ki shipai jong ka Russia.
Ki drone ki la kylla long ka bynta ba kongsan jong ka buit treikam jong ka Ukraine, da kaba hiar thma ïa ki jaka shna umphniang jong ka Russia, ki jaka buh tiar siat, bad ki jaka buh tiar ialeh. Ki don ki drone kiba trei kum ki kynhun kamikaze, kiwei pat ki pynhap bom bad ki wan phai biang, katba bun pat ki pyndonkam na ka bynta ban wad bniah.
Ka jingpynrung kam kaba la pynshlur lyngba ki rynsan pathai jingtip jong ka tnat shipai Ukraine, ka thmu ban pynrung sa kumba 15,000 ngut ki shipai ban dang pynïasoh thymmai, kynthup ïa ki kynthei, ki ban treikam na ka bynta ki kam thma bad ki kam bym ïadei bad ka thma ruh kumjuh.
