Austria, Nohprah:
Katkum ki khubor, la ïathuh ba katei ka longkmie na Austria, kaba la 33 snem ka rta, ka la ïap eh ha u lum Grossglockner, hadien ba la suba ba ka la shah iehnoh ha u samla jongka, uba dei u nongkiew lum bad la ithuh kyrteng ïa ka kum ka Kerstin Gurtner. Ka dei ka nong Salzburg kaba la khot sin ïalade hapoh ki rynsan ‘Social Media’ kum ka “khun jong ka aïom Tlang” bad ka “nongkiew lum”. Dei ha u Kyllalyngkot jong une u snem 2025 hi ba ka Gurtner ka la leit sha ka mishon kiew lum ban kiew ïa u Lum Grossglockner ba jrong tam jong ka Austria, ryngkat bad u samla jongka, u Thomas Plamberger, 39 snem ka rta, uba la tbit bad ïaid lynti bha ha katei ka kam kiew lum.
Kitei ki arngut ki la sdang ban kiew ïa utei u lum hadien ar kynta jong ka por kaba ki la buh bad thmu ban sdang bad ki la ïakynduh ïa ki jingeh kiba jur bha, kynthup ïa ka jingdaitthah ka suiñ bneng kaba haduh -20°C bad ki lyer kiba jur kum ka eriong.
Ki nongmudui ki la kynnoh ba u Plamberger u la iehnoh ïa ka Gurtner “khlem jingïada” ban leit wad jingïarap ha ka por 2 baje mynstep, hynrei um shym la pyndonkam ïa ki jaiñkup ne ka byrni bivouac kiba suk ban pyndonkam, ban ïada ïa ka, na ka jingkhriat. La ïathuh ba u la ap da ki kynta ban ïakynduh ïa ki tnat pynlait im bad u la buh ïa ka phone jong u ha ka ‘Silent Mode’ hadien ka jingtip jong u sha ki tnat ïarap, ha kaba u la duh noh ïa ki lad jingpyrshang jong ki tnat ïarap ban poi sha ka jaka ba ki don ha ka por kaba biang.
Ki kynhun ai jingïarap kim shym la lah ban poi sha ka jaka ba ka don ka Gurtner haduh ka step kaba bud namar ka jingjur jong ka lyer, ha kaba la lap ïa ka met ap jong ka ha ka sngi kaba bud.
Haba ïadei bad kane, u Plamberger u la shah pynngat hapoh ki kyndon pynkheiñ aiñ jong ka jingpynïap briew da kaba leh bym suitñiew ïa ka mynsiem briew bad u lah ban shah set patok haduh lai snem lada shah rai pynrem na ka liang ka ïingbishar.
