Hyderabad, Nohprah:
Kawei ka samla nong India kaba dei na ka distrik Jangaon jong ka jylla Telangana, ka la khlad noh hadien ba ka jaka sah jongka hapoh United States ka la kem ding bad pluh noh ha ka Sngi Palei jong kane ka taïew ba la dep.
Ia katei ka samla, la ithuh kum ka Sahaja Reddy Udumala bad ka la leit poi shong- sah ha US naduh u snem 2021 naka bynta ban pyndep ïa ki jingpule jongka kiba kham shalor. Kane ka samla, ka sah ha Albany, hapoh ka nongbah New York.
Katkum ki kaiphod ba la ioh lum na ki tnat ba dei khmih, la ong ba katei ka ding ka la pur na kawei ka ïing ba marjan bad ka la nang heh shuh- shuh ynda ka la ioh ban pur sha ka ïing jong ka Sahaja bad la ong ba ka Sahaja ka dang ïoh thiah lyngngai ha ka por ba ka ding ka la klang ha ka ïingsah jong ka bad dei kane ka daw kaba la pynlongïia ka ban nym ïoh lad shuh ban phet ynda ka la kyndit hadien ba ka ding ka la heh bad klang jur.
Katkum ka jingpynbna jong ka tnat Consulate General of India, kaba don ha New York, ka la pynpaw ka jingsngewkhia kaba jur halor ka jingduh noh ïa kawei ka mynsiem briew ba kordor ka Ms Sahaja Reddy Udumala, kaba long ka nongshong shnong jong ka ri India, kaba la duh noh ïa la ka jingim ha katei ka jingpluh ka ïingsah jong ka hapoh Albany. Kumta, la phah ruh ïa ka jingsngewlem sha ka ïing- ka sem jong katei ka samla, kaba hap ban mad ia kum kane ka khubor kaba sngewsih kthang ha katei ka jingjia ba sniewbok.
Katei ka tnat ka la ïathuh ba ka dang iatreilang bad ki bor ba dei khmih ban poi sha ki bahaïing jong katei ka samla bad ba kan lah ban ïarap kat ki jingdonkam kiba ka lah ban ai jingïarap.
