Shillong, Nohprah 09
U manager ka Real Madrid u Xabi Alonso uba la don hapoh ka jingeh, u la ong ba ka jinglong jingman ka lah ban kylla ha kaba ka kynhun jong u ka dangpynkhreh na ka bynta ka jingïakhun kaba kongsan ha ka Champions League pyrshah ïa ka Manchester City ha ka step jong ka sngi Palei.
Ka Real Madrid ka la lah ban khur jingjop tang ar sien ha ki hynñiew sien ïakhun ha baroh ki lympung ïalehkai bad ka la shah rem noh ha ka Celta Vigo da 2-0 kol ha ka lympung La Liga ha ka sngi U Blei. Ki khubor na Spain ki la pynpaw ba u Alonso u lah ban shah weng noh na kane ka kam ba u bat lada kane ka kynhun ka shah rem ha ka City hapoh ka jingïalam u Pep Guardiola.
“Kane ka dei ka kynhun kaba ngi ïatylli, bad haba phi dei u coach ka Real Madrid phi hap ban long kiba la khreh ban ïakhun ïa kine ki jingeh da kaba jaijai, da ka jingïatylli bad ka jingkitkhlieh,” la pynpaw u Alonso ha ki lad pathai khubor ha ka sngi Ba-ar.
“Nga khmih lynti ïa kaei kaban sa wan, bad kata kan sdang lashai ka sngi. Ngi tip ba kane ka lah ban kylla, na ka jingbitar jong kaei kaba la jia ha ka sngi U Blei bad ngi thrang eh ban ïalehkai bha pyrshah ïa ka City.”
U Alonso u la ong ba ka kynhun jong u ka ngeit ba kan lah ban pynliem ïa ka Manchester City bad ban khanglad ïa u rangthep kol ba kynsai jong ka, u Erling Haaland ha Santiago Bernabeu.
