Guwahati, Nohprah:
Ha ka por kylli jingkylli ha Lok Sabha, la pynpaw ba ka jingdon jong ki nongïoh jingmyntoi hapoh ka skhim PM-KISAN ha Assam ka la hiar bha halor ki bynta ba bud ryntih, kaba la pynmih ïa ka jingsngewkhia halor ka jingpynshisha ïa ka jinglong hok bad ka jingduna ha ki jingtip.
Katkum ka jingtip ba thikna ba la pyni da ka tnad Agriculture jong ka sorkar pdeng, ka bhah ba nyngkong jong ka PM-KISAN ha Assam la ïoh da ki 11,55,516 ngut ki nongïoh jingmyntoi, ha kaba ka jingmang pisa ka long T.231.10 klur.
Hynrei haduh ka sien kaba 12 jong ka jingsiew, ka jingdon ka la hiar sha ka 4,89,144 ngut ki nongïoh jingmyntoi, ha kaba ka jingpynmih pisa ka la hiar sha ka T.121.60 klur.
Kane ka mut ba hapoh ki 12 ki bynta ba la dep, ka thup jong ki nongïoh jingmyntoi jong ka Assam ka la hiar haduh shiteng, kaba la buh jingkylli shaphang ki rukom pynshisha, ka jingweng ïa ki kyrteng, bad ka jingktah kaba kham heh ïa ka imlang sahlang jong ki nongrep jong ka jylla.
Ha ka jingïalang jong ka Parliament, ki MP jong ka Congress na Assam ki la pan jingshai, da kaba kylli, “Balei ka jingkheiñ ka la hiar shiteng, bad kiei ki sienjam ba la shim ban pynbeit ïa ki jingbym ïahap bad jingpynslem jong ki jingbuh jingkheiñ?”
Ka Ministry ka la jubab ba la pynlong kum ka jingpynshisha ïa ka Aadhaar, ka jingthung symbai ha ka jaka, bad ka jingbud ryntih ïa ka e-KYC ban ïada na ka jingsiew bym dei hok. Ki kyrteng kiba la weng namar ka jingbym ïahap ne ka jingbym lah ban pynshisha lah ban pynphai biang lada ki nongrep ki pynbeit ïa ki jingthoh jong ki.
Ka jingtip ba la pynpaw shai katkum jong ka Assam, la ong ba ki nongïoh myntoi na ka bynta ka jingsiew kaba nyngkong sha ki 11,55,516 ngut ka la long T. 231.10 klur ha ka jingsiew kaba 12 sha ki 4,89,144 ngut ka la long T. 120.60 klur
Ka jinghiar kaba jur ka la mih kum ka mat ba kongsan na Assam ha ka jingïakren jong ka ïing dorbar hynnin ka sngi, kaba la pynlong ïa ki jingkhot ban pynbeit ryntih ïa ka jingpynrung kyrteng, ban pynbeit kham kloi, bad ban pynshai na ka bynta ki nongrep kiba dang ap ïa ki jingmyntoi.
