Shillong, Nohprah 09
Ka lahduh jong ka First Division, ka Nongkseh ka la lah ban pynliem noh ïa ka kynhun ki 10 ngut ki rangïalehkai ka Langsning lyngba ka tie-breaker da 4-3 kol bad ban jam sha ka final ha ka lympung ïalehkai SSA Champions Cup 2025 ha ka sngi Ba-ar ha SSA Stadium kaba ha First Ground, Polo.
Te kumta ka Nongkseh ka la long ka kynhun kaba nyngkong eh ban jam sha ka final ha kane ka lympung bad kan pynkhreh ban ïaknieh nam lahduh pyrshah ïa ka Shillong Lajong lane ka Meghalaya Police. Ka Lajong bad ka MLP kin ïakhun ïa ka semi final kaba ar ha ka sngi Balang ha ka por 4:30 janmiet.
Ban khur ïa ka jingjop, ka Nongkseh ha kaba nyngkong ka donkam ban wanphai da ka jingkhlaiñ bor hadien ba la shah thep ar kol ha ka Langsning lyngba u Donlad Dieng-doh (3) bad u Dajiedlang Wanshnong (17). Te kumta ka Langsning kam shym la lah ban ïada ha ka bynta kaba shadien ha kaba ka la shah pynphai kylla ha ka Nongkseh lyngba u Mebankhraw Wah-lang (21) bad u Kynsaibor Lhuid (30).
Kane ka jingïakhaid tang ha ki shiteng kynta ka la pynshong shit ïa ki paidbah nongkyrshang, hynrei ym shym la don kiba lah ban thep kol haduh kaba kut. Dei ha ka tie-breaker ba ka Nongkseh ka la lah ban pynurlong ïa ka jingjop.
Na ka daw ka jinglah ban ïalehkai bha u Kynsaibor u la ïohpdiang ïa ka nam Hello Meghalaya Player of the Match ha kaba u la ïohpdiang da ka memento lem bad ka cheque kaba T. 5,000 ba la sam da ka Adviser jong ka Sorkar Jylla ka Kong M Ampa-reen Lyngdoh, MLA ka Laitumkhrah Constituency.
