Shillong, Nohprah 10
Ki ar kol ba la thep da u Jules Kounde ki la biang pura ïa ka Barcelona ban pynliem noh ïa ka Eintracht Frankfurt da 2-1 kol ha ka lympung Champions League ha ka sngi Balang bad ka la don jingkyrmen ban kynjoh sha ka thup ba phra.
Ha ka jingshisha dei u Ansgar Knauff uba la pynkhih jar nyngkong na ka bynta ka Frankfurt, hynrei utei u rangïalehkai ‘dien na France u Kounde u la lah ban thep kylla ar kol ha ka kylla miet.
Ha ka jingïakhun ba nyngkong jong ka ha ka Champions League ha Camp Nou naduh u snem 2022, ka Barcelona ka la lah ban pynliem kylla ïa ka Frankfurt kaba la jop ha ka Europa League ha u juh u snem.
Katei ka kynhun ïalehkai jong ka Bundesliga ka la pyndap ïa ka Camp Nou da la ki jong ki nongkyrshan bad ka la pynliem noh ïa ka Barca na kata ka jingïakhun ha kawei na ki por ba ki don hapoh ka jingïalam jong u Xavi Hernandez.
Da ka jingjop ha katei ka lympung bad ka jingïoh rung sha ka semi final jong ka Champions League, u nongmih bujli ha ka jaka u Xavi, u Hansi Flick, u la lah ban pynbha ïa ka jinglong jingman jong ka Barca. Hynrei ka kynhun ka la ïakynduh jingeh ha kane ka aïom.
Ka jingshah rem ha ka Chelsea bad Paris Saint-Germain ka la pynlong ïa ka Barca ban don hapdeng ka jingeh kaba khraw ha Europe, hynrei lyngba ka jingjop ïa ka Frankfurt ka la pynïoh jingkyrmen ïa kane ka kynhun bad ban lait na ka jingïakhun ‘play-off’.
“Ngam shym la sngewphylla ïa ki jingeh ba ngi ïakynduh, hynrei ka Champions League ka long kaba pher bad nga da sngew sarong shibun”, la pynpaw u Flick ha ki lad pathai khubor.
Utei u coach u la ong ba ka jingwanphai biang sha ka jingjop ka la long ka jingkyrmen ïa ka kynhun,” hynrei u la kam ba kan long kaba kham bha ban jam shakhmat ha ki jingïalehkai.
Ka Barcelona ka la pynjynjar ïa ki nongkyrshan jong ka Frankfurt ban ïoh tiket ha kane ka kynti da kaba pynslem ïa ka jingdie jong ki. Nalor ka jingduna ki nongkyrshan kiba la wan ai mynsiem ïa kane ka kynhun.
Ka Barcelona ka la lah ban tehlakam ïa ka jingïalehkai, da kaba ka la lah ban ïalehkai bha pyrshah ïa ka Frankfurt, kaba la shah rem ha ka RB Leipzig da 6-0 kol ha ka sngi Saitjaiñ ha ka lympung Bundesliga.
Lyngba kane ka jingjop ka Barca ka la jam sha ka kyrdan ba khadsaw, ha kaba ka dangduna sa 2 poiñ ïa ka Liverpool kaba don ha ka kyrdan ba phra, katba ka Frankfurt ka la don ha kaba 30.
