Shillong, Nohprah 10
Ka Meghalaya ka donkam ba kan pynhap ïa ki saw ki wiket ba dangsah jong ka Nagaland na ka bynta ban khur ïa ka jingjop ha ka lympung ïalehkai U-19 men’s Cooch Behar Trophy 2025-26, ha kaba ka kabu ksiar kaba la paw shynna ïa ka Meghalaya ban jop ïa kane ka jingïakhun ka dei ha ki 45 minit shwa ban kut noh ka sngi jong ka jingïakhun jong ka sngi kaba lai, ha madan ïalehkai ka MCA, Polo.
Ha kane ka kynti ïakhun, ka Meghalaya ka la buh ïa ka thong kaba long 375 ron ïa ka Nagaland, kaba hangne kum ka kynhun ka la pyrshang ba kan ïakhun tyngeh tad haduh ba ka la lah shwa ba kan kamai 194 ron bad shah pynhap 2 wiket.
Shipor ki nongtied ka Nagaland la i kumba ki la lah ban ïalehkai bha, ha kaba u kapten ka Meghalaya u Angkit Tamang u la shimti hi noh halade ban kawang bol ryngkat bad u Apandanka Marak, ha kaba kine ki arngut ki la lah pat ban pynhap ïa ki wiket ba sah ka Nagaland kaba haduh ba kut jong ka sngi, ka la lah ban kamai 208 ron hadien ba ka la hap noh 6 wiket, bad kaba donkam ïa ka Nagaland ha ka sngi kaba bud sa kumba 167 ron ban jop ïa kane ka jingïakhun.
Kumban shu phai dien sha kane ka jingïakhun, ka Meghalaya kaba la wan ban sdang ïa ka pali tied kaba ar ka jong ka na ki 137 ron hadien ba la shah pynhap noh 5 wiket, ha kaba ka la kamai 227 ron, kaba shwa jong kane, ha ka pali ba nyngkong, ka Meghalaya ka la kamai 312 ron, kata ba ka Nagaland ha ka pali ba nyngkong jong ka, ka la kamai 165 ron.
Kumta ka sngi kaba lai bad ba khatduh jong kane ka jingïakhun hi ka long ba ki nongkawang bol ka Meghalaya ki donkam katba lah ban pynhap ïa kine ki saw wiket ba dangsah ka Nagaland ban pynkshem pat ïalade ban khreh jam shakhmat ha kane ka lympung.
