Imphal, Nohprah:
Ki pulit jong ka Manipur Imphal West distrik ki la kem ïa saw ngut ki briew kiba shah kynnoh ba ki la dawa pisa ha ka 8 tarik u Nohprah, ha kaba ka jingïoh kem jong ki kadei ha ka 9 tarik u Nohprah. Kiba la shah kem ki kynthup ïa arngut ki dkhot jong ka kynhun UNLF (Pambei), kiba la tip kyrteng kum u Ningthoujam Nongpoknganba Meitei, uba la 31 snem ka rta, bad u Konthoujangd Nelson Singh uba la 23 snem ka rta. Kine ki arngut ki la shahkem ha Awang Wabagai. Ka UNLF (Pambei) ka la ïasoi ïa ka jingïateh kular bad ka sorkar pdeng ha u snem 2023, hynrei ki bor jong ka aiñ ki la kdew ba ki katto katne ki dkhot ki la bteng ban leh ïa ki kam runar.
Ka jingkhynra ba la leh da ki bor jong ka aiñ ka la pynlong ruh ban kem ïa arngut ki dkhot ka SOREPA. U Chungkham Nanao Macha uba ju tip ruh kum u Mitlang uba la 24 snem ka rta u la shah kem na Ningthemkol. U Arambam Thoithoi Singh, uba 41 snem ka rta, u la shah kem ha Changangei. Ka UNLF (Pambei) ka la don mynshwa ka jingïateh kular bad ka sorkar pdeng ha u snem 2023. Hynrei ki don ki dkhot kiba la ïai bteng ha ki kam beaiñ.
Ha kawei pat ka jingjia kaba ïadei bad kane, ki pulit ki la ïoh ban kurup ïa ka jaka buh tiar siat bad ki kuli na Ngairangbam Mayai Lambi Loukon ha kane kajuh ka distrik ha ka 8 tarik u Nohprah. Ki tiar ba la lap ki kynthup ïa ar tylli ki Single-barrelle, uwei u bom kawang kti, uwei u Smoke grenade, uwei u 36-HE Grenade khlem tiar pynbthei, 53 song ki kuli bad ar tylli ki Radio Set. Shuh shuh, la ong ba ka pisa kaba T. 3.90 lak ka bym don jingkheiñ la lap haba la khmih bniah na kine kiba la shahkem.
